യു.ഡി.എഫ്. പ്രകടനപത്രിക ഇന്ന് പുറത്തിറക്കും; എല്‍ഡിഎഫ് സര്‍ക്കാരിനെതിരായ 'കുറ്റപത്രം'

  സംസ്ഥാനത്തെ തദ്ദേശ തെരഞ്ഞെടുപ്പില്‍ എല്‍.ഡി.എഫിനെ പ്രതിരോധത്തിലാക്കാന്‍ ലക്ഷ്യമിട്ട്, യു.ഡി.എഫ്. പ്രകടനപത്രിക ഇന്ന രാവിലെ 10:30-ന് കൊച്ചിയില്‍ പ്രകാശനം ചെയ്യും. ഭരണവിരുദ്ധ വികാരം ആളിക്കത്തിക്കുന്നതിനും, അതോടൊപ്പം ജനകീയ ബദല്‍ അവതരിപ്പിക്കുന്നതിനുമായി പ്രകടനപത്രികയെ രണ്ട് സുപ്രധാന ഘട്ടങ്ങളായാണ് പ്രതിപക്ഷം രൂപകല്‍പ്പന ചെയ്തിരിക്കുന്നത്. കേരള രാഷ്ട്രീയം ആകാംഷയോടെ കാത്തിരിക്കുന്ന നിര്‍ണ്ണായക പ്രഖ്യാപനങ്ങള്‍ക്കാകും ഇന്ന് കൊച്ചി സാക്ഷ്യം വഹിക്കുക. പ്രകടനപത്രികയുടെ പ്രകാശന ചടങ്ങില്‍ ആദ്യമായി അവതരിപ്പിക്കുന്നത്, നിലവിലെ എല്‍.ഡി.എഫ്. സര്‍ക്കാരിന്റെ ഒന്‍പതര വര്‍ഷത്തെ ഭരണത്തെ നിശിതമായി വിമര്‍ശിക്കുന്ന 'കുറ്റപത്രമാണ്'. സംസ്ഥാനം നേരിടുന്ന കടുത്ത സാമ്പത്തിക തകര്‍ച്ച, ഭരണപരമായ പരാജയങ്ങള്‍, അഴിമതി ആരോപണങ്ങള്‍, പൊതുമേഖലയിലെ ദുരവസ്ഥകള്‍ എന്നിവ കണക്കുകള്‍ സഹിതം തുറന്നുകാട്ടാനാണ് യു.ഡി.എഫ്. ലക്ഷ്യമിടുന്നത്. ഈ കുറ്റപത്രം തദ്ദേശ തെരഞ്ഞെടുപ്പ് പ്രചാരണത്തില്‍ സര്‍ക്കാരിനെതിരെ മുഖ്യായുധമാക്കി, ഭരണത്തുടര്‍ച്ചയുടെ എല്ലാ അവകാശവാദങ്ങളെയും പൊളിച്ചെഴുതാന്‍ കഴിയുമെന്നാണ് പ്രതിപക്ഷത്തിന്റെ പ്രതീക്ഷ. കുറ്റപത്രം അവതരിപ്പിച്ച ശേഷം, യു.ഡി.എഫ്. തദ്ദേശ സ്വയംഭരണ സ്ഥാപനങ്ങളില്‍ അധികാരം ലഭിച്ചാല്‍ നടപ്പിലാക്കാന്‍ ഉദ്ദേശിക്കുന്ന വികസന കാഴ്ചപ്പാടുകള്‍ ഉള്‍ക്കൊള്ളുന്ന പ്രധാന പ്രകടനപത്രിക പുറത്തിറക്കും. ഈ രണ്ടാം ഘട്ടം ഊന്നല്‍ നല്‍കുന്നത് അധികാര വികേന്ദ്രീകരണത്തിനുള്ള വ്യക്തമായ പദ്ധതികള്‍ക്കും മാറ്റങ്ങള്‍ക്കുമാണ്. ഗ്രാമ-നഗര തലങ്ങളിലെ തദ്ദേശ സ്ഥാപനങ്ങള്‍ക്ക് കൂടുതല്‍ സാമ്പത്തിക സ്വാതന്ത്ര്യവും ഭരണപരമായ അവകാശങ്ങളും നല്‍കി ജനപങ്കാളിത്തം ഉറപ്പാക്കുന്ന നിര്‍ണ്ണായകമായ പരിഷ്‌കാരങ്ങള്‍ പത്രികയില്‍ ഉണ്ടാകുമെന്നാണ് സൂചന. ഈ പ്രഖ്യാപനങ്ങളിലൂടെ ജനങ്ങള്‍ക്ക് കൂടുതല്‍ അടുത്ത് നില്‍ക്കുന്ന ഒരു ഭരണ സംവിധാനം വാഗ്ദാനം ചെയ്ത്, താഴെത്തട്ടില്‍ സ്വാധീനം ഉറപ്പിക്കാന്‍ യു.ഡി.എഫ്. ശ്രമിക്കും.