റാന്നി വലിയ കലുങ്കിന് സമീപം പ്രവർത്തിക്കുന്ന പഞ്ചാബി ഹോട്ടലിൽ ഭക്ഷണം കഴിക്കാനെത്തിയവരും ജീവനക്കാരും തമ്മിലുണ്ടായ തർക്കവും സംഘർഷവും ഒടുവിൽ പോലീസ് കേസിലേക്ക് നയിച്ചു. മുൻ എം.എൽ.എമാരായ രാജു ഏബ്രഹാം, അഡ്വ. പ്രമോദ് നാരായണൻ എന്നിവരുടെ സ്റ്റാഫായിരുന്ന അനൂപ്, ഡി.വൈ.എഫ്.ഐ പ്രവർത്തകനായ വിജോ എന്നിവരും ഹോട്ടൽ ജീവനക്കാരും തമ്മിലാണ് ബില്ലിന്റെ പേരിൽ തർക്കമുണ്ടായത്.
സംഭവം ആദ്യം ഇരുകൂട്ടരും ചേർന്ന് ഒത്തുതീർപ്പാക്കാൻ ശ്രമിച്ചെങ്കിലും, ഹോട്ടലിലെ സംഘർഷത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് വിഷയം വീണ്ടും സങ്കീർണ്ണമായത്. തുടർന്ന് ഇരുവിഭാഗവും റാന്നി പോലീസിൽ പരാതി നൽകുകയായിരുന്നു.
അനൂപും വിജോയും മദ്യപിച്ചെത്തി ഹോട്ടലിൽ അകാരണമായി ബഹളമുണ്ടാക്കുകയും സംഘർഷം സൃഷ്ടിക്കുകയും ചെയ്തുവെന്നാണ് ഹോട്ടൽ ഉടമയുടെ മുഖ്യ പരാതി. ഇതിന്റെ അടിസ്ഥാനത്തിൽ ഹോട്ടലിൽ ബഹളമുണ്ടാക്കിയ ഇവർക്കെതിരെയും, സംഭവവുമായി ബന്ധപ്പെട്ട് ഹോട്ടൽ ഉടമയ്ക്കും ജീവനക്കാർക്കുമെതിരെയും റാന്നി പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
