പത്തനംതിട്ട ജില്ലയിലെ നാല് തദ്ദേശ വാർഡുകളിലേക്ക് നടന്ന ഉപതിരഞ്ഞെടുപ്പിൽ മുഴുവൻ സീറ്റുകളും തൂത്തുവാരി യു.ഡി.എഫ് മിന്നുന്ന വിജയം നേടി. കുറ്റൂർ പഞ്ചായത്തിലെ ഓതറ, കുന്നന്താനം പഞ്ചായത്തിലെ വള്ളോക്കുന്ന്, റാന്നി പഞ്ചായത്തിലെ ബ്ലോക്കുപടി, അരുവാപ്പുലം പഞ്ചായത്തിലെ കല്ലേലി എന്നീ വാർഡുകളിലാണ് ഉപതിരഞ്ഞെടുപ്പ് നടന്നത്. ആകെയുള്ള 4,142 വോട്ടർമാരിൽ 2,788 പേർ രേഖപ്പെടുത്തിയതോടെ ജില്ലയിൽ ശരാശരി 67.31 ശതമാനം പോളിങ് രേഖപ്പെടുത്തി.
റാന്നി പഞ്ചായത്തിലെ ബ്ലോക്ക്പടി വാർഡിൽ വാശിയേറിയ പോരാട്ടത്തിനൊടുവിൽ കോൺഗ്രസിലെ എം.ആർ. രമ്യമോൾ 5 വോട്ടുകളുടെ നേരിയ ഭൂരിപക്ഷത്തിന് വിജയിച്ചു. രമ്യമോൾ 287 വോട്ടുകൾ നേടിയപ്പോൾ എൽ.ഡി.എഫ് സ്ഥാനാർത്ഥി ജിസി സാബു 282 വോട്ടുകളും എൻ.ഡി.എയുടെ മേഘാ ജയൻ 16 വോട്ടുകളും നേടി. 71.77 ശതമാനം പോളിങ് രേഖപ്പെടുത്തിയ ഇവിടെ ആകെയുള്ള 815 വോട്ടർമാരിൽ 585 പേർ (344 സ്ത്രീകളും 241 പുരുഷന്മാരും) വോട്ട് രേഖപ്പെടുത്തി.
അരുവാപ്പുലം പഞ്ചായത്തിലെ കല്ലേലി വാർഡിൽ യു.ഡി.എഫിലെ അനില സുരേഷ് 112 വോട്ടിന്റെ മികച്ച ഭൂരിപക്ഷത്തിൽ വിജയം സ്വന്തമാക്കി. അനില സുരേഷ് 381 വോട്ടുകൾ നേടിയപ്പോൾ എൽ.ഡി.എഫിന്റെ സുമതി രമണന് 269 വോട്ടും എൻ.ഡി.എ സ്ഥാനാർത്ഥി ബി. മായയ്ക്ക് 32 വോട്ടും ലഭിച്ചു. മുൻ പഞ്ചായത്ത് അംഗം സി.വി. ശാന്തകുമാർ അടൂർ എം.എൽ.എയായി തിരഞ്ഞെടുക്കപ്പെട്ടതിനെ തുടർന്നാണ് ആറാം വാർഡായ കല്ലേലിയിൽ ഉപതിരഞ്ഞെടുപ്പ് വേണ്ടിവന്നത്. 63.8 ശതമാനം പോളിങ് നടന്ന വാർഡിൽ 1,069 വോട്ടർമാരിൽ 682 പേരാണ് (367 സ്ത്രീകളും 315 പുരുഷന്മാരും) സമ്മതിദാനാവകാശം വിനിയോഗിച്ചത്.
കുന്നന്താനം പഞ്ചായത്തിലെ രണ്ടാം വാർഡായ വള്ളോക്കുന്നിൽ വാശിയേറിയ ത്രികോണ മത്സരത്തിനൊടുവിൽ സി.പി.എമ്മിൽ നിന്ന് യു.ഡി.എഫ് സ്ഥാനാർത്ഥി രാധാമണിയമ്മ വാർഡ് തിരിച്ചുപിടിച്ചു. കേവലം 2 വോട്ടുകൾക്കാണ് യു.ഡി.എഫ് വിജയം. ഇവിടെ എൻ.ഡി.എ രണ്ടാം സ്ഥാനത്തെത്തി എന്നത് ശ്രദ്ധേയമാണ്. യു.ഡി.എഫ് 276, എൻ.ഡി.എ 274, എൽ.ഡി.എഫ് 259 എന്നിങ്ങനെയാണ് ഇവിടെ ലഭിച്ച വോട്ടുകൾ. 1,160 വോട്ടർമാരുള്ള ഈ വാർഡിൽ 69.74 ശതമാനം പോളിങ് രേഖപ്പെടുത്തി (809 വോട്ടുകൾ).
കുറ്റൂർ പഞ്ചായത്തിലെ എട്ടാം വാർഡായ ഓതറയിൽ യു.ഡി.എഫ് സ്ഥാനാർത്ഥി രതീഷ്‌മോൻ രവി 148 വോട്ടുകളുടെ മികച്ച ഭൂരിപക്ഷത്തിൽ വിജയിച്ചു. വാർഡ് അംഗമായിരുന്ന പിതാവ് രവി അന്തരിച്ചതിനെ തുടർന്നാണ് ഇവിടെ ഉപതിരഞ്ഞെടുപ്പ് നടന്നത്. 64.84 ശതമാനം പോളിങ് രേഖപ്പെടുത്തിയ വാർഡിൽ ആകെ 1,098 വോട്ടർമാരിൽ 712 പേർ (342 പുരുഷന്മാരും 370 സ്ത്രീകളും) വോട്ട് രേഖപ്പെടുത്തി.
