'നിന്റെ ജോലി തെറിപ്പിക്കും'; സ്റ്റോപ്പ് മെമോ നൽകിയ പഞ്ചായത്ത് സെക്രട്ടറിക്ക് സി.പി.എം ലോക്കൽ സെക്രട്ടറിയുടെ ഭീഷണി
അനധികൃത നിർമ്മാണത്തിന് സ്റ്റോപ്പ് മെമോ നൽകിയ കടപ്ര പഞ്ചായത്ത് സെക്രട്ടറിക്ക് നേരെ സി.പി.എം ലോക്കൽ സെക്രട്ടറിയുടെ ഭീഷണി. കടപ്ര മുൻ പഞ്ചായത്ത് പ്രസിഡന്റും സി.പി.എം പരുമല ലോക്കൽ സെക്രട്ടറിയുമായ ഷിബു വർഗീസാണ് പഞ്ചായത്ത് സെക്രട്ടറിയെ ഭീഷണിപ്പെടുത്തിയത്. ഭീഷണിയെ തുടർന്ന് ഉദ്യോഗസ്ഥർ ഷിബു വർഗീസിനെതിരെ പൊലീസിൽ ഔദ്യോഗികമായി പരാതി നൽകിയിട്ടുണ്ട്.
ഷിബു വർഗീസ് നിർമ്മിക്കുന്ന മഴവെള്ള സംഭരണി അനധികൃതമാണെന്ന് ചൂണ്ടിക്കാണിച്ചാണ് പഞ്ചായത്ത് ഉദ്യോഗസ്ഥർ സ്റ്റോപ്പ് മെമോ നൽകിയത്. ഇതേത്തുടർന്ന് നിർമ്മാണ പ്രവർത്തനങ്ങൾ നേരിട്ട് വിലയിരുത്തുന്നതിനും തുടർനടപടികൾക്കുമായാണ് പഞ്ചായത്ത് സെക്രട്ടറിയും മറ്റ് ഉദ്യോഗസ്ഥരും സ്ഥലത്തെത്തിയത്. ഈ പരിശോധനയ്ക്കിടയിലാണ് തന്റെ രാഷ്ട്രീയ സ്വാധീനം ഉപയോഗിച്ച് ഉദ്യോഗസ്ഥരുടെ 'ജോലി തെറിപ്പിക്കും' എന്ന് ലോക്കൽ സെക്രട്ടറി ഭീഷണി മുഴക്കിയത്.
അതേസമയം, പഞ്ചായത്ത് സെക്രട്ടറിക്ക് നേരെ ഉയർന്ന ഭീഷണിപ്പെടുത്തൽ ആരോപണങ്ങൾ ഷിബു വർഗീസ് പൂർണ്ണമായും നിഷേധിച്ചു. താൻ ഉദ്യോഗസ്ഥരെ ഭീഷണിപ്പെടുത്തിയിട്ടില്ലെന്നും നിലവിൽ നടക്കുന്നത് പൂർണ്ണമായും നിയമപരമായ നിർമ്മാണ പ്രവർത്തനങ്ങളാണെന്നുമാണ് ഷിബു വർഗീസിന്റെ വിശദീകരണം. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.