Mobile app available on
Trending
Browse

All sections

Watch
Browse all videos

No business videos available

No Middle East videos available

Popular News

ട്രംപ് ഭരണകൂടത്തിന് വീണ്ടും തിരിച്ചടി: F-1 വിസ വിദ്യാർഥികളുടെ പ്രായോഗിക പരിശീലന അവസരങ്ങൾ (CPT) വെട്ടിക്കുറച്ച നടപടി റദ്ദാക്കി യുഎസ് കോടതി

ട്രംപ് ഭരണകൂടത്തിന് വീണ്ടും തിരിച്ചടി: F-1 വിസ വിദ്യാർഥികളുടെ പ്രായോഗിക പരിശീലന അവസരങ്ങൾ (CPT) വെട്ടിക്കുറച്ച നടപടി റദ്ദാക്കി യുഎസ് കോടതി

വാഷിംഗ്ടൺ: അമേരിക്കൻ സർവകലാശാലകളിൽ പഠിക്കുന്ന അന്താരാഷ്ട്ര വിദ്യാർഥികളുടെ ഇന്റേൺഷിപ്പുകൾക്കും പ്രായോഗിക പരിശീലന അവസരങ്ങൾക്കും നിയന്ത്രണം ഏർപ്പെടുത്തിയ ട്രംപ് ഭരണകൂടത്തിന്റെ നടപടി യുഎസ് ഫെഡറൽ കോടതി തടഞ്ഞു. ട്രംപ് ഭരണകൂടത്തിന്റെ കർശനമായ കുടിയേറ്റ നയങ്ങൾക്കേറ്റ കനത്ത തിരിച്ചടിയായാണ് ഈ വിധി വിലയിരുത്തപ്പെടുന്നത്.

F-1 വിസയിലുള്ള അന്താരാഷ്ട്ര വിദ്യാർഥികൾക്ക് അവരുടെ പഠനവിഷയങ്ങളുമായി ബന്ധപ്പെട്ട തൊഴിൽ പരിചയം നേടാൻ സഹായിക്കുന്ന കരിക്കുലർ പ്രാക്ടിക്കൽ ട്രെയിനിങ് (സി.പി.ടി.) പ്രോഗ്രാമിന്റെ യോഗ്യതകൾ പരിമിതപ്പെടുത്തിക്കൊണ്ട് കഴിഞ്ഞ ഓഗസ്റ്റിലാണ് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി (ഡി.എച്ച്.എസ്.) പുതിയ നിർദ്ദേശങ്ങൾ പുറപ്പെടുവിച്ചത്. ഈ രണ്ട് നിർദ്ദേശങ്ങളും നടപ്പാക്കുന്നത് തടഞ്ഞുകൊണ്ട് നവംബർ 17-നാണ് ബോസ്റ്റണിലെ യുഎസ് ഡിസ്ട്രിക്റ്റ് ജഡ്ജി ഉത്തരവിറക്കിയത്.

അസോസിയേഷൻ ഓഫ് അമേരിക്കൻ യൂണിവേഴ്സിറ്റീസ്, പ്രസിഡന്റ്സ് അലയൻസ് ഓൺ ഹയർ എജ്യുക്കേഷൻ ആൻഡ് ഇമിഗ്രേഷൻ എന്നിവരുൾപ്പെടെ നാല് പ്രമുഖ ഉന്നത വിദ്യാഭ്യാസ സംഘടനകൾ നൽകിയ ഹർജിയിലാണ് കോടതിയുടെ നിർണ്ണായക ഇടപെടൽ. ഓഗസ്റ്റിലെ പുതിയ നിർദ്ദേശങ്ങൾ രാജ്യത്തുടനീളമുള്ള അന്താരാഷ്ട്ര വിദ്യാർഥികളുടെ ഇന്റേൺഷിപ്പ്, പരിശീലന അവസരങ്ങളെ സാരമായി തടസ്സപ്പെടുത്തിയെന്ന് സംഘടനകൾ കോടതിയിൽ വാദിച്ചു.

കഴിഞ്ഞ 35 വർഷത്തിലേറെയായി, പഠനവിഷയവുമായി നേരിട്ട് ബന്ധമുള്ളതും പാഠ്യപദ്ധതിയുടെ ഭാഗവുമായ ഇന്റേൺഷിപ്പുകൾ ചെയ്യാൻ വിദേശ വിദ്യാർഥികൾക്ക് സർവകലാശാലകളുടെ അനുമതിയുണ്ടായിരുന്നു. അക്കാദമിക് ക്രെഡിറ്റ് ലഭിക്കുന്നതോ ബിരുദം പൂർത്തിയാക്കാൻ ആവശ്യമായതോ ആയ പരിശീലനങ്ങൾ ഇതിൽ ഉൾപ്പെട്ടിരുന്നു.

എന്നാൽ, ഒരു പ്രത്യേക ഡിഗ്രി പ്രോഗ്രാമിൽ ചേരുന്ന എല്ലാ വിദ്യാർഥികൾക്കും പ്രായോഗിക പരിശീലനം നിർബന്ധമാണെങ്കിൽ മാത്രമേ സി.പി.ടി. അനുവദിക്കൂ എന്നായിരുന്നു ഓഗസ്റ്റിൽ ഡി.എച്ച്.എസ്. കൊണ്ടുവന്ന നിബന്ധന. ഇതോടെ അക്കാദമിക് ക്രെഡിറ്റിനായി വിദ്യാർഥികൾ സ്വന്തം താല്പര്യപ്രകാരം തിരഞ്ഞെടുക്കുന്ന ഇന്റേൺഷിപ്പുകൾക്കുള്ള അവസരം പൂർണ്ണമായും ഇല്ലാതായിരുന്നു.

നയപരമായ വലിയ മാറ്റം കൃത്യമായി വ്യക്തമാക്കാതെ, സി.പി.ടി. യോഗ്യത സംബന്ധിച്ച ദീർഘകാലമായുള്ള വ്യാഖ്യാനത്തിൽ ഏകപക്ഷീയമായി മാറ്റം വരുത്തുന്നതിലൂടെ ഭരണകൂടം 'അഡ്മിനിസ്ട്രേറ്റീവ് പ്രൊസീജ്യർ ആക്ട്' ലംഘിച്ചതായി പ്രഥമദൃഷ്ട്യാ വ്യക്തമാണെന്ന് ജഡ്ജി ജൂലിയ കോബിക് നിരീക്ഷിച്ചു.

ഹർജിയിൽ ഉദ്ധരിച്ചിട്ടുള്ള യുഎസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് കണക്കുകൾ പ്രകാരം 2024-ൽ 1,40,775 അന്താരാഷ്ട്ര വിദ്യാർഥികൾക്കാണ് സി.പി.ടി. അനുമതി ലഭിച്ചത്. ആമസോണും ടെസ്‌ലയുമായിരുന്നു ആ വർഷം ഏറ്റവും കൂടുതൽ സി.പി.ടി. വിദ്യാർഥികൾക്ക് തൊഴിൽ നൽകിയ സ്ഥാപനങ്ങൾ. കോടതി വിധിയോട് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി ഇതുവരെ പ്രതികരിച്ചിട്ടില്ല.

Related articles

See all
Popular News

സമുദ്രാന്തര കേബിളിന് തകരാർ; പാകിസ്ഥാനിൽ ഇന്റർനെറ്റ് സേവനങ്ങൾ തടസ്സപ്പെട്ടു

Popular News

ട്രംപിനെയും ഉന്നത നേതാക്കളെയും വധിക്കാൻ ഗൂഢാലോചന; പാകിസ്താൻ പൗരന് 27.5 വർഷം തടവുശിക്ഷ

Popular News

'ഞങ്ങൾ നിങ്ങളെ കണ്ടെത്തും'; യു.എസ്. നാവിക ഉദ്യോഗസ്ഥരുടെ ചിത്രങ്ങൾ പങ്കുവെച്ച് ഇറാന്റെ വധഭീ...

Popular News

യു.എസ്. ഇടക്കാല തിരഞ്ഞെടുപ്പിന് തുടക്കം; ട്രംപിന്റെ ഭരണനേട്ടങ്ങൾ വിലയിരുത്തുന്ന നിർണ്ണായക...

Save your stories

Sign in