തിരുവനന്തപുരം: അരിയില് ഷുക്കൂര് വധക്കേസില് പ്രധാനപ്പെട്ടവരെ കുറ്റവിമുക്തരാക്കിയ നടപടി സര്ക്കാര് ഗൗരവത്തോടെ കാണുന്നുവെന്ന് ആഭ്യന്തരമന്ത്രി രമേശ് ചെന്നിത്തല. രാഷ്ട്രീയ വേട്ടയാടലല്ല നടന്നത്, രാഷ്ട്രീയ കൊലപാതകമാണെന്നും മന്ത്രി മാധ്യമങ്ങളോട് പ്രതികരിച്ചു. താലിബാന് മാതൃകയിലുള്ള അതിക്രൂരമായ കൊലപാതകമാണ് നടന്നത്. സംഭവത്തിനെതിരെ കേരളമാകെ പ്രതിഷേധമുയര്ന്നിട്ടുണ്ട്. രാഷ്ട്രീയപ്പകയുടെ ഇരയായിരുന്നു ഷുക്കൂര്. എതിരാളികളെ ഇല്ലാതാക്കുന്ന അപകടകരമായ രാഷ്ട്രീയ സംസ്കാരം അവസാനിച്ചേ തീരൂ. ഷുക്കൂറിന്റെ ബന്ധുക്കളുമായി കൂടിയാലോചിച്ച ശേഷമായിരിക്കും തുടര്നടപടികള് തീരുമാനിക്കുക. കോടതി വിധിയുടെ പകര്പ്പ് ലഭിച്ചശേഷം സര്ക്കാര് കൂടുതല് ആലോചന നടത്തുമെന്നും കൊലപാതകത്തിന് പിന്നില് പ്രവര്ത്തിച്ചവരെ എല്ലാവര്ക്കും അറിയാമെന്നും മന്ത്രി പ്രതികരിച്ചു.
അരിയില് ഷുക്കൂര് വധക്കേസ്: നടന്നത് രാഷ്ട്രീയ കൊലപാതകമെന്ന് ആഭ്യന്തര മന്ത്രി രമേശ് ചെന്നിത്തല