തമിഴ്‌നാട്ടിലെ തേനിയില്‍ പടക്കം പൊട്ടിക്കുന്നത് ചോദ്യം ചെയ്ത സ്‌പെഷ്യല്‍ സബ് ഇന്‍സ്പെക്ടറെ മര്‍ദിച്ച് കൊലപ്പെടുത്തി. മദ്യലഹരിയില്‍ പൊലീസുകാരനെ ആക്രമിച്ച മൂന്ന് പേരെ അറസ്റ്റ് ചെയ്തു. റോഡ് തടസ്സപ്പെടുത്തി പടക്കം പൊട്ടിക്കുകയും റീല്‍സ് ചിത്രീകരിക്കുകയും ചെയ്ത യുവാക്കളെ ചോദ്യം ചെയ്തതിലുള്ള വിരോധത്തെ തുടര്‍ന്ന് നടത്തിയ ആക്രമണത്തില്‍ ഗുരുതരമായി പരിക്കേറ്റ സ്‌പെഷ്യല്‍ സബ് ഇന്‍സ്പെക്ടര്‍ ആശുപത്രിയിലേക്ക് കൊണ്ടുപോകുന്നതിനിടെ മരിച്ചു.
തേനി ജില്ലാ പൊലീസ് ഡെപ്യൂട്ടി സൂപ്രണ്ട് ഓഫീസില്‍ സ്‌പെഷ്യല്‍ സബ് ഇന്‍സ്പെക്ടറായി ജോലി ചെയ്തുവരികയായിരുന്നു സെന്തില്‍കുമാര്‍. ഇന്നലെ ജോലി കഴിഞ്ഞ് അദ്ദേഹം വീട്ടിലേക്ക് മടങ്ങുകയായിരുന്നു. അതിനിടെ തേനി സമതര്‍മ്മപുരം സമീപം ചില യുവാക്കള്‍ മദ്യലഹരിയില്‍ റോഡ് തടസ്സപ്പെടുത്തി പടക്കം പൊട്ടിക്കുകയായിരുന്നുവെന്നാണ് വിവരം. കൂടാതെ, പടക്കം പൊട്ടിക്കുന്നത് മൊബൈല്‍ ഫോണില്‍ വീഡിയോയായി ചിത്രീകരിച്ച് റീല്‍സ് ചെയ്യുന്നതിലും ഇവര്‍ ഏര്‍പ്പെട്ടിരുന്നു. ഇത് അതുവഴി കടന്നുപോയ പൊതുജനങ്ങള്‍ക്കും വാഹനയാത്രക്കാര്‍ക്കും ബുദ്ധിമുട്ടുണ്ടാക്കി. ഈ സമയത്ത് അതുവഴി എത്തിയ എസ്.എസ്.ഐ. സെന്തില്‍കുമാര്‍, പൊതുജനങ്ങള്‍ക്ക് തടസ്സമുണ്ടാകുന്ന രീതിയില്‍ പടക്കം പൊട്ടിക്കരുതെന്ന് യുവാക്കള്‍ക്ക് മുന്നറിയിപ്പ് നല്‍കി. യുവാക്കളുടെ പ്രവര്‍ത്തനങ്ങള്‍ അദ്ദേഹം മൊബൈല്‍ ഫോണില്‍ വീഡിയോയായി പകര്‍ത്തിയതായും പറയപ്പെടുന്നു.
ഇതില്‍ പ്രകോപിതരായ യുവാക്കള്‍ സെന്തില്‍കുമാറുമായി വാക്കുതര്‍ക്കത്തിലേര്‍പ്പെട്ടു. തുടര്‍ന്ന് അദ്ദേഹത്തെ ക്രൂരമായി മര്‍ദിച്ച് നിലത്തേക്ക് തള്ളിയിടുകയായിരുന്നുവെന്നാണ് വിവരം. ആക്രമണത്തില്‍ ഗുരുതരമായി പരിക്കേറ്റ സെന്തില്‍കുമാറിനെ ഉടന്‍ ആശുപത്രിയിലേക്ക് കൊണ്ടുപോയെങ്കിലും ആശുപത്രിയിലെത്തുന്നതിന് മുമ്പുതന്നെ അദ്ദേഹം മരിച്ചതായി ഡോക്ടര്‍മാര്‍ അറിയിച്ചു. പൊലീസ് സേനയില്‍ ജോലി ചെയ്തിരുന്ന സ്‌പെഷ്യല്‍ സബ് ഇന്‍സ്പെക്ടര്‍ യുവാക്കളുടെ ആക്രമണത്തില്‍ കൊല്ലപ്പെട്ട സംഭവം പൊലീസ് സേനയ്ക്കുള്ളില്‍ വലിയ ദുഃഖവും ഞെട്ടലും സൃഷ്ടിച്ചിട്ടുണ്ട്. തുടര്‍ന്ന് തേനി ജില്ലാ പൊലീസ് സൂപ്രണ്ട് പ്രവീണ്‍ ഗൗതം സംഭവസ്ഥലം നേരിട്ട് സന്ദര്‍ശിച്ച് പരിശോധന നടത്തി. പ്രദേശത്തെ സിസിടിവി ദൃശ്യങ്ങള്‍ പരിശോധിച്ച പൊലീസ് അന്വേഷണം ഊര്‍ജിതമാക്കിയിട്ടുണ്ട്. സംഭവവുമായി ബന്ധപ്പെട്ട് മൂന്ന് യുവാക്കളെ അറസ്റ്റ് ചെയ്തതായാണ് വിവരം. ഇവരെ പൊലീസ് വിശദമായി ചോദ്യം ചെയ്തുവരികയാണ്.
തേനിയില്‍ പൊതുറോഡില്‍ പടക്കം പൊട്ടിച്ച് റീല്‍സ് ചിത്രീകരണം: ചോദ്യം ചെയ്ത പൊലീസുകാരനെ തല്ലിക്കൊന്നു; മൂന്ന് പേര്‍ അറസ്റ്റിൽ
Jaihind TV News Report
Jaihind TV Web Desk
3 min read
99 reads
