ന്യൂഡല്‍ഹി: ദീപാവലി ആഘോഷങ്ങള്‍ പൂര്‍ത്തിയായതിന് തൊട്ടുപിറ്റേന്ന് രാജ്യതലസ്ഥാനമായ ഡല്‍ഹി വീണ്ടും കടുത്ത വായുമലിനീകരണത്തിന്റെ പിടിയിലമര്‍ന്നു. തിങ്കളാഴ്ച രാവിലെ രേഖപ്പെടുത്തിയ കണക്കുകള്‍ പ്രകാരം ഡല്‍ഹിയിലെ ശരാശരി വായു ഗുണനിലവാര സൂചിക (AQI) 366 ആണ്. ഇത് 'ഏറെ മോശം' (Very Poor) വിഭാഗത്തിലാണ് തരംതിരിച്ചിരിക്കുന്നത്. എന്നാല്‍ നഗരത്തിലെ 15 ഓളം പ്രധാന നിരീക്ഷണ കേന്ദ്രങ്ങളില്‍ എ.ക്യു.ഐ 400 പിന്നിട്ട് 'അതീവ ഗുരുതര' (Severe) ഘട്ടത്തിലെത്തിനില്‍ക്കുകയാണ്.
രാവിലെ മുതല്‍ നഗരത്തിന്റെ വിവിധ ഭാഗങ്ങളില്‍ പുകമഞ്ഞും കട്ടിമഞ്ഞും രൂപപ്പെട്ടതോടെ കാഴ്ചപരിധി വന്‍തോതില്‍ കുറഞ്ഞു. വടക്ക്, തെക്ക്, മധ്യ ഡല്‍ഹി മേഖലകളിലും കിഴക്കന്‍ പ്രദേശങ്ങളിലും കനത്ത മൂടല്‍മഞ്ഞിന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് (IMD) പ്രത്യേക മുന്നറിയിപ്പ് നല്‍കിയിട്ടുണ്ട്. റോഡ്-വിമാന ഗതാഗതത്തെ മഞ്ഞ് കാര്യമായി ബാധിക്കാന്‍ സാധ്യതയുള്ളതിനാല്‍ യാത്രക്കാര്‍ ജാഗ്രത പാലിക്കണമെന്നാണ് നിര്‍ദ്ദേശം. നിലവില്‍ ഡല്‍ഹി-എന്‍.സി.ആര്‍ മേഖലയില്‍ വായുമലിനീകരണം നിയന്ത്രിക്കുന്നതിനുള്ള 'ഗ്രേഡഡ് റെസ്പോണ്‍സ് ആക്ഷന്‍ പ്ലാനിന്റെ' മൂന്നാം ഘട്ടം (GRAP Stage III) ശക്തമായി തുടരുകയാണ്.
ദീപാവലിക്ക് പിന്നാലെ ഡല്‍ഹിയില്‍ ശ്വാസംമുട്ടിക്കുന്ന പുകമഞ്ഞ്; വായുനിലവാരം 'അതീവ ഗുരുതരം', 15 ഇടങ്ങളില്‍ എ.ക്യു.ഐ 400 കടന്നു
Jaihind TV News Report
Jaihind TV Web Desk
2 min read
354 reads
