തിരുവനന്തപുരം: സിപിഎം നേതാവും മുന്‍ സ്പീക്കറുമായ പി ശ്രീരാമകൃഷ്ണന്‍റെ ഫേസ്ബുക്ക് പോസ്റ്റിന് മറുപടിയുമായി സ്വപ്നാ സുരേഷ്. ഇത് ഒരു ഓർമ്മപ്പെടുത്തലാണെന്ന കുറിപ്പോടെ ശ്രീരാമകൃഷ്ണന്‍റെ സ്വകാര്യ ചിത്രങ്ങള്‍ അടക്കം സ്വപ്ന ഫേസ്ബുക്ക് പോസ്റ്റ് ചെയ്തു.
"ഇത് ലളിതവും വിനീതവുമായ ഒരു മറുപടിയാണ്. ശ്രീരാമകൃഷ്ണന്‍റെ ഫേസ്ബുക്ക് പോസ്റ്റിനും അനുബന്ധ വാദങ്ങൾക്കും എതിരെയുള്ള ഓർമ്മപ്പെടുത്തല്‍ കൂടിയാണ്. ഇതിലൂടെ അദ്ദേഹത്തിന് ഒന്നും ഓർമ്മ വരുന്നില്ലെങ്കില്‍ എനിക്ക് എതിരെ മാനനഷ്ടക്കേസ് ഫയൽ ചെയ്യാൻ ഞാൻ ഈ മാന്യനോട് അഭ്യർത്ഥിക്കുന്നു. എങ്കില്‍ ഓർമ്മപ്പെടുത്താനായി ബാക്കി തെളിവുകൾ ഞാന്‍ ബഹുമാനപ്പെട്ട കോടതിയിൽ ഹാജരാക്കാം" - സ്വപ്ന ഫേസ്ബുക്ക് പോസ്റ്റില്‍ കുറിച്ചു.
സ്വപ്നയുടെ ആരോപണങ്ങൾ നിഷേധിച്ച് പി ശ്രീരാമകൃഷ്ണന്‍ നേരത്തെ രംഗത്തെത്തിയിരുന്നു. ഒരു സ്ത്രീയോടും മോശമായി പെരുമാറിയിട്ടില്ലെന്നും ഔദ്യോഗിക വസതിയിലേക്ക് സ്വപ്നയെ ഒറ്റക്ക് ക്ഷണിച്ചുവെന്ന ആരോപണം തെറ്റാണെന്നുമായിരുന്നു ശ്രീരാമകൃഷ്ണൻ കുറിച്ചത്. ആർക്കും അനാവശ്യമായ മെസേജുകൾ അയച്ചിട്ടില്ലെന്നും ആരോപണങ്ങളെ രാഷ്ട്രീയമായി തന്നെ നേരിടുന്നതിനോടൊപ്പം നിയമപരമായ വശങ്ങളും പരിശോധിച്ച് മുന്നോട്ട് പോകുമെന്നുമായിരുന്നു മുന്‍ സ്പീക്കറുടെ പോസ്റ്റ്. ഇതിനുള്ള മറുപടിയായാണ് സ്വപ്ന രംഗത്തെത്തിയിരിക്കുന്നത്. ശ്രീരാമകൃഷ്ണനെ തീർത്തും പ്രതിരോധത്തിലാക്കിയ സ്വപ്ന ആരോപണങ്ങള്‍ തെറ്റാണെങ്കില്‍ മാനനഷ്ടക്കേസ് ഫയല്‍ ചെയ്യാനും വെല്ലുവിളിച്ചു.
