സൂരി നായകനാകുന്ന പുതിയ ചിത്രത്തിന് ചെന്നൈയിൽ തുടക്കം; നായികയായി രജിഷ വിജയൻ, ക്ലാപ്പടിച്ച് ശിവകാർത്തികേയൻ

നടൻ സൂരി നായകനാകുന്ന പുതിയ ചിത്രത്തിന്റെ പൂജാ ചടങ്ങ് ചെന്നൈയിൽ വെച്ച് നടന്നു. താൽക്കാലികമായി 'സൂരി07' എന്ന് പേരിട്ടിരിക്കുന്ന ഈ ചിത്രത്തിന്റെ തുടക്കം കുറിച്ചുകൊണ്ട് നടൻ ശിവകാർത്തികേയൻ ക്ലാപ്പടിച്ചു കൊണ്ട് ആശംസകൾ അറിയിച്ചു. സൂരി നായകനായി എത്തുന്ന ഏഴാമത്തെ ചിത്രമാണിത് എന്ന പ്രത്യേകതയുമുണ്ട്. ഈ ചിത്രത്തിൽ മലയാളത്തിന്റെ പ്രിയ താരം രജിഷ വിജയനാണ് നായികയായെത്തുന്നത്.

'ഇൻട്ര് നേട്ര് നാളൈ', 'അയലാൻ' എന്നീ ശ്രദ്ധേയമായ ചിത്രങ്ങൾ ഒരുക്കിയ ആർ. രവികുമാറാണ് ഈ ചിത്രം സംവിധാനം ചെയ്യുന്നത്. പ്രമുഖ തെലുങ്ക് നിർമ്മാണ കമ്പനിയായ മൈത്രി മൂവി മേക്കേഴ്സിന്റെ ബാനറിൽ നവീൻ യെർനേനിയും വൈ. രവിശങ്കറും ചേർന്നാണ് നിർമ്മാണം നിർവഹിക്കുന്നത്. തമിഴിനൊപ്പം തെലുങ്കിലും ഒരേസമയം ചിത്രം ഒരുങ്ങുന്നുണ്ട്. 2015-ൽ ചെന്നൈയിലുണ്ടായ ഭീകരമായ വെള്ളപ്പൊക്കത്തെ അടിസ്ഥാനമാക്കിയുള്ള ഒരു തീവ്രമായ വൈകാരിക ഡ്രാമയാണ് ഈ സിനിമയെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.

അതേസമയം, 'മണ്ടാടി' എന്ന ചിത്രമാണ് സൂരിയുടേതായി ഏറ്റവും ഒടുവിൽ റിലീസ് ചെയ്തത്. കടലോര പശ്ചാത്തലത്തിൽ കഥ പറയുന്ന ഒരു ആക്ഷൻ ഡ്രാമയായി ഒരുങ്ങിയ ഈ ചിത്രം വലിയ പ്രേക്ഷക സ്വീകാര്യതയാണ് നേടിയത്. 150 കോടിയിലധികം കളക്ഷൻ നേടിയ ചിത്രം തമിഴ്‌നാട്ടിൽ നിന്ന് മാത്രം 100 കോടി രൂപ സ്വന്തമാക്കിയിരുന്നു. മലയാളത്തിന്റെ പ്രിയ താരം മഹിമ നമ്പ്യാർ നായികയായി എത്തിയ ഈ ചിത്രത്തിൽ സത്യരാജ് പ്രധാന കഥാപാത്രത്തെ അവതരിപ്പിച്ചിരുന്നു. കൂടാതെ മിഥുൻ ജയ് ശങ്കർ, രവീന്ദ്ര വിജയ്, ബാല ശരവണൻ, സ്റ്റൺ ശിവ, കൃതിക ബാലസുബ്രഹ്മണ്യം എന്നിവരും ചിത്രത്തിൽ നിർണ്ണായക വേഷങ്ങളിൽ അഭിനയിച്ചിട്ടുണ്ട്.