സന്നിധാനം: വ്രതശുദ്ധിയുടെ 41 ദിനരാത്രങ്ങൾക്ക് തുടക്കമിട്ടുകൊണ്ട് മണ്ഡല-മകരവിളക്ക് മഹോത്സവത്തിനായി ശബരിമല അയ്യപ്പക്ഷേത്ര നട തുറന്നു. തിങ്കളാഴ്ച വൈകീട്ട് നാലുമണിയോടെയാണ് നട തുറന്നത്. തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ ഉൾപ്പെടെയുള്ള പ്രമുഖർ ചടങ്ങിൽ സന്നിഹിതരായിരുന്നു. നട തുറക്കുന്ന വേളയിൽ ശബരിമല, മാളികപ്പുറം ക്ഷേത്രങ്ങളിലേക്ക് പുതുതായി തിരഞ്ഞെടുക്കപ്പെട്ട മേൽശാന്തിമാർ പതിനെട്ടാം പടിക്ക് താഴെയായി നിലകൊണ്ടു. ആദ്യദിനം തന്നെ സന്നിധാനത്ത് ഭക്തരുടെ വലിയ തിരക്കാണ് അനുഭവപ്പെട്ടത്.
തന്ത്രി കണ്ഠരര് ബ്രഹ്മദത്തന്റെ മുഖ്യകാർമികത്വത്തിൽ നിലവിലെ മേൽശാന്തി ഇ.ഡി. പ്രസാദ് നമ്പൂതിരിയാണ് നടതുറന്ന് ശ്രീകോവിലിൽ ദീപം തെളിയിച്ചത്. തുടർന്ന് ആഴിയിൽ അഗ്നി പകർന്ന ശേഷം നിയുക്ത മേൽശാന്തിമാരായ അരീക്കര ഇല്ലത്ത് സുബ്രഹ്മണ്യൻ നമ്പൂതിരിയെയും (ശബരിമല), ആയാടത്തില്ലത്ത് ദാമോദരൻ നമ്പൂതിരിയെയും (മാളികപ്പുറം) നിലവിലെ മേൽശാന്തിമാർ സോപാനത്തേക്ക് ആനയിച്ചു.
വൈകീട്ട് 6:30-ഓടെ സോപാനത്ത് വെച്ച് നിയുക്ത ശബരിമല മേൽശാന്തി സുബ്രഹ്മണ്യൻ ശങ്കരൻ നമ്പൂതിരിയെ തന്ത്രി അഭിഷേകം ചെയ്ത് അവരോധിക്കും. മാളികപ്പുറം ക്ഷേത്രത്തിൽ നിയുക്ത മേൽശാന്തി എ. ദാമോദരൻ നമ്പൂതിരിയുടെ അവരോധിക്കൽ ചടങ്ങും നടക്കും. തിങ്കളാഴ്ച മറ്റ് പ്രത്യേക പൂജകൾ ഉണ്ടായിരിക്കുന്നതല്ല.
വൃശ്ചികപ്പുലരിയായ ചൊവ്വാഴ്ച പുലർച്ചെ മൂന്നിന് പുതിയ മേൽശാന്തിമാർ നടകൾ തുറക്കുന്നതോടെ ഈ വർഷത്തെ മണ്ഡലകാല തീർഥാടനത്തിന് ഔദ്യോഗിക തുടക്കമാകും. ഡിസംബർ 27-നാണ് മണ്ഡലപൂജ; അന്നു രാത്രി നടയടയ്ക്കുന്നതോടെ മണ്ഡലകാലം സമാപിക്കും. തുടർന്ന് മകരവിളക്ക് തീർഥാടനത്തിനായി ഡിസംബർ 30-ന് വൈകീട്ട് വീണ്ടും നട തുറക്കും. ജനുവരി 14-നാണ് മകരവിളക്ക്. ജനുവരി 19 വരെ ഭക്തർക്ക് ദർശന സൗകര്യമുണ്ടാകും, 20-ന് നട അടയ്ക്കും.
തീർഥാടന കാലത്ത് പ്രതിദിനം 80,000 പേർക്കാണ് ദർശനത്തിന് അനുമതി നൽകിയിരിക്കുന്നത്. ഇതിൽ 66,000 പേർക്ക് വെർച്വൽ ക്യൂ വഴി ഓൺലൈനായി ബുക്ക് ചെയ്യാം (നിലയ്ക്കൽ-പമ്പ പാത വഴി 60,000, എരുമേലി കാനനപാത വഴി 3,000, വണ്ടിപ്പെരിയാർ-സത്രം പാത വഴി 3,000 എന്നിങ്ങനെയാണ് ക്രമീകരണം). കൂടാതെ നിലയ്ക്കലിൽ 10,000 പേർക്കും, എരുമേലിയിലും വണ്ടിപ്പെരിയാറിലും 2,000 പേർക്ക് വീതവും സ്പോട്ട് ബുക്കിങ് സൗകര്യവും ഏർപ്പെടുത്തിയിട്ടുണ്ട്.
ശരണം വിളികളാൽ മുഖരിതമായി സന്നിധാനം; മണ്ഡല-മകരവിളക്ക് മഹോത്സവത്തിനായി ശബരിമല നട തുറന്നു