കോഴിക്കോട്: ഓൺലൈൻ സൈബർ സാമ്പത്തിക തട്ടിപ്പുകളും തട്ടിപ്പുകാർക്കായി ബാങ്ക് അക്കൗണ്ടുകൾ വാടകയ്ക്ക് നൽകുന്ന (Mule Accounts) സംഘങ്ങളെയും കണ്ടെത്താൻ കേരള പൊലീസ് നടത്തുന്ന പ്രത്യേക പരിശോധനയായ 'ഓപ്പറേഷൻ സൈ ഹണ്ടി'ന്റെ (Operation Cy-Hunt) ഭാഗമായി കോഴിക്കോട്ട് വ്യാപക റെയ്ഡ്. കോഴിക്കോട് സിറ്റി, റൂറൽ പൊലീസ് പരിധികളിൽ നടന്ന പരിശോധനയിൽ അഞ്ച് യുവതികൾ ഉൾപ്പെടെ 37 പേർക്കെതിരെ പൊലീസ് കേസെടുത്തു.
വിവിധ കേസുകളിലായി എട്ട് പേരെ ഇതിനോടകം പൊലീസ് അറസ്റ്റ് ചെയ്തിട്ടുണ്ട്. കോഴിക്കോട് സിറ്റി പൊലീസ് പരിധിയിൽ 14 കേസുകളും, റൂറൽ പൊലീസ് പരിധിയിൽ 23 കേസുകളുമാണ് രജിസ്റ്റർ ചെയ്തത്. സൈബർ തട്ടിപ്പുകൾക്ക് കൂട്ടുനിൽക്കുന്നവർക്കെതിരെ വരും ദിവസങ്ങളിലും കർശന നടപടി തുടരുമെന്ന് പൊലീസ് അറിയിച്ചു.
'ഓപ്പറേഷൻ സൈ ഹണ്ട്': കോഴിക്കോട്ട് വ്യാപക റെയ്ഡ്; 5 യുവതികൾ ഉൾപ്പെടെ 37 പേർക്കെതിരെ കേസ്, 8 പേർ അറസ്റ്റിൽ