കോഴിക്കോട്: സംസ്ഥാനത്തെ സ്‌കൂൾ കായികപ്രതിഭകൾ മാറ്റുരയ്ക്കുന്ന 68-ാമത് കേരള സ്‌കൂൾ കായികമേളയ്ക്ക് കോഴിക്കോട് ജില്ല ആതിഥേയത്വം വഹിക്കുന്നു. ഒക്ടോബർ 25 മുതൽ 31 വരെ നടക്കുന്ന ഈ കായികമാമാങ്കത്തിന്റെ അവസാനവട്ട ഒരുക്കങ്ങൾ പൂർത്തിയായിവരുന്നു. കായികതാരങ്ങൾ, ടീം മാനേജർമാർ, ഒഫീഷ്യൽസ്, സംഘാടകർ എന്നിവരടക്കം പതിനയ്യായിരത്തോളം പേരാണ് മേളയുടെ ഭാഗമാകുന്നത്. ഏഷ്യയിലെ തന്നെ ഏറ്റവും വലിയ കൗമാര കായികമേളകളിലൊന്നായ ഇത്തവണത്തെ മേളയിൽ ഗൾഫ് മേഖലയിൽ നിന്നുള്ള 48 കായികതാരങ്ങളുടെ പങ്കാളിത്തവും ഉറപ്പാക്കിയിട്ടുണ്ട്. കൊല്ലം ജില്ലയിലെ എട്ടാം ക്ലാസ് വിദ്യാർത്ഥിനിയായ ആർ.എസ്. ലക്ഷ്മി നന്ദന രൂപകൽപ്പന ചെയ്ത 'കുട്ടു' ആണ് ഈ മേളയുടെ ഭാഗ്യചിഹ്നം.
ഒക്ടോബർ 25-ന് നടക്കുന്ന ഉദ്ഘാടനച്ചടങ്ങിൽ 4,000 കായികതാരങ്ങൾ അണിനിരക്കുന്ന വർണാഭമായ മാർച്ച് പാസ്റ്റും 3,000 കുട്ടികൾ പങ്കെടുക്കുന്ന സാംസ്‌കാരിക പരിപാടികളും നടക്കും. ഇതിന് മുന്നോടിയായുള്ള സ്വർണക്കപ്പ് ഘോഷയാത്രയും ദീപശിഖാ പ്രയാണവും വിവിധ ജില്ലകളിലെ പര്യടനത്തിന് ശേഷം ഒക്ടോബർ 25-ന് കോഴിക്കോടെത്തും.
പ്രധാന മത്സരവേദികൾ:
മത്സരങ്ങൾക്കായി ആകെ 10 വേദികളാണ് ഒരുക്കിയിരിക്കുന്നത്. മേളയിലെ പ്രധാന ആകർഷണമായ ട്രാക്ക് ആൻഡ് ഫീൽഡ് മത്സരങ്ങൾക്ക് നാഷണൽ ഇൻസ്റ്റിറ്റ്യൂട്ട് ഓഫ് ടെക്‌നോളജി (എൻ.ഐ.ടി.) കോഴിക്കോട് ക്യാമ്പസ് വേദിയാകും. ഒക്ടോബർ 27 മുതൽ 31 വരെയാണ് അത്‌ലറ്റിക്‌സ് മത്സരങ്ങൾ. സബ് ജൂനിയർ, ജൂനിയർ, സീനിയർ വിഭാഗങ്ങളിലായി 2,800 കായികതാരങ്ങൾ ഇവിടെ ട്രാക്കിലിറങ്ങും. ഒക്ടോബർ 30-ന് നടക്കുന്ന ക്രോസ് കൺട്രി മത്സരങ്ങൾക്കും എൻ.ഐ.ടി. വേദിയാകും.
കൂടാതെ ദേവഗിരി സെന്റ് ജോസഫ് കോളേജ് (ബാഡ്മിന്റൺ), ചേവായൂർ പ്രസന്റേഷൻ എച്ച്.എസ്.എസ്. (പെൺകുട്ടികളുടെ ബാസ്‌കറ്റ്‌ബോൾ), സിൽവർ ഹിൽസ് പബ്ലിക് സ്‌കൂൾ (ആൺകുട്ടികളുടെ ബാസ്‌കറ്റ്‌ബോൾ), കുന്നമംഗലം എച്ച്.എസ്.എസ്. (വടംവലി), കൊടിയത്തൂർ പി.ടി.എം. എച്ച്.എസ്.എസ്., വാദി റഹ്‌മ ഇംഗ്ലീഷ് സ്‌കൂൾ (കരാട്ടെ, വുഷു, സോഫ്റ്റ്‌ബോൾ, ബേസ്‌ബോൾ, ബോൾ ബാഡ്മിന്റൺ), ചാത്തമംഗലം ആർ.ഇ.സി. ജി.വി.എച്ച്.എസ്.എസ്. (യോഗ), പെരുവയൽ സെന്റ് സേവ്യേഴ്‌സ് യു.പി. സ്‌കൂൾ (നെറ്റ്‌ബോൾ, ത്രോബോൾ) എന്നിവിടങ്ങളിലാണ് മറ്റ് മത്സരങ്ങൾ നടക്കുന്നത്.
ഇൻക്ലൂസീവ് മത്സരങ്ങളും വിപുലമായ ക്രമീകരണങ്ങളും:
പ്രത്യേക പരിഗണന അർഹിക്കുന്ന കുട്ടികൾക്കായി സംഘടിപ്പിക്കുന്ന ഇൻക്ലൂസീവ് മത്സരങ്ങൾ മേളയുടെ മറ്റൊരു പ്രത്യേകതയാണ്. ഒക്ടോബർ 26-നാണ് ഈ മത്സരങ്ങൾ നടക്കുന്നത്. ഇൻക്ലൂസീവ് അത്‌ലറ്റിക്‌സ്, ഫുട്‌ബോൾ, ക്രിക്കറ്റ്, ബാഡ്മിന്റൺ മത്സരങ്ങളിലായി 2,000-ത്തിലധികം കുട്ടികൾ മാറ്റുരയ്ക്കും.
മേളയുടെ സുഗമമായ നടത്തിപ്പിനായി കുന്നമംഗലം എം.എൽ.എ. എം.എ. റസാഖ് മാസ്റ്ററുടെ നേതൃത്വത്തിൽ 17 സബ് കമ്മിറ്റികൾ പ്രവർത്തിക്കുന്നുണ്ട്. 620 ഒഫീഷ്യലുകൾ, 140 സെലക്ടർമാർ, 100 ടെക്നിക്കൽ ഒഫീഷ്യലുകൾ എന്നിവരുടെ സേവനം മേളയിലുണ്ട്. കായികതാരങ്ങളുടെ താമസത്തിനായി 50 സ്‌കൂളുകളിൽ 450 ക്ലാസ് മുറികളും, ഭക്ഷണവിതരണത്തിനായി രണ്ട് പ്രധാന അടുക്കളകളും എല്ലാ വേദികളിലും പ്രത്യേക ഭക്ഷണശാലകളും ഒരുക്കിയിട്ടുണ്ട്. കുട്ടികളുടെ യാത്രാസൗകര്യത്തിനായി പ്രത്യേക സ്‌കൂൾ ബസുകളും സജ്ജമാക്കിയിട്ടുണ്ട്.
സംസ്ഥാന സ്‌കൂൾ കായികമേളയ്ക്ക് കോഴിക്കോട് ഒരുങ്ങി; ഒക്ടോബർ 25 മുതൽ 31 വരെ കായികമാമാങ്കം
Jaihind TV News Report
Jaihind TV Web Desk
3 min read
128 reads
