കള്ളപ്പണ, സ്വർണ്ണക്കടത്ത് കേസുകളിൽ ജുഡീഷ്യൽ അന്വേഷണം വേണം ; സിപിഎം - ബിജെപി നീക്ക് പോക്കുണ്ട് : കെ മുരളീധരന്‍ എംപി

ബിജെപി കള്ളപ്പണ, സ്വർണക്കടത്ത് കേസുകളിൽ ജുഡീഷ്യൽ അന്വേഷണം വേണമെന്ന് കോൺഗ്രസ് നേതാവ് കെ മുരളീധരൻ എംപി. തിരുവനന്തപുരത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. കേന്ദ്ര-സംസ്ഥാന സർക്കാരുകൾ പരസ്പര സഹകരണ സംഘങ്ങളായി പ്രവർത്തിക്കുകയാണെന്നും മുരളീധരൻ ആരോപിച്ചു. ജുഡീഷ്യൽ അന്വേഷണമോ അല്ലെങ്കിൽ ഹൈക്കോടതിയുടെ മേൽനോട്ടത്തിലുള്ള അന്വേഷണമോ ഇല്ലെങ്കിൽ ഈ കേസുകൾ തേച്ചുമായ്ച്ചുകളയും. സത്യം പുറത്തുവരാൻ മറ്റു വഴികളില്ല. എത്ര സ്വർണം കടത്തിയാലും കുറച്ച് കിറ്റ് കൊടുത്താൽ തെരഞ്ഞെടുപ്പ് ജയിക്കാമെന്നൊരു വിശ്വാസം സിപിഎമ്മിനുണ്ട്. വോട്ട് ചെയ്ത് വിശ്വാസമർപ്പിച്ച ജനങ്ങളെ വഞ്ചിക്കുകയാണ് മുഖ്യമന്ത്രി ചെയ്യുന്നത്. കേസുകൾ ഇല്ലാതാക്കാൻ കേന്ദ്രവുമായി സഹകരിക്കുന്നു. 24 മണിക്കൂറും കോൺഗ്രസ്-ബിജെപി ബന്ധമെന്നു പറഞ്ഞുകൊണ്ടിരിക്കും. യഥാർത്ഥ ബന്ധം സിപിഎമ്മും ബിജെപിയുമായാണ്- മുരളീധരൻ ആരോപിച്ചു. സുരേന്ദ്രൻ വെല്ലുവിളിക്കുന്നത് കണ്ടതാണ്. ഒരു ഘട്ടത്തിൽ സുരേന്ദ്രന്റെ മകനെ വരെ അറസ്റ്റ് ചെയ്യുമെന്ന് വാർത്തകൾ വന്നു. ഞങ്ങളുടെ പാർട്ടി പ്രസിഡന്റിന്റെ മകനെ അറസ്റ്റ് ചെയ്താൽ നിങ്ങളുടെ സെക്രട്ടറിയുടെ മകൻ ഞങ്ങളുടെ കൈയിലുണ്ടെന്ന് കുമ്മനം പറഞ്ഞത് അപ്പോഴാണ്. അതൊരു ഭീഷണിയാണ്. ആ ഭീഷണിക്കുശേഷം പിന്നീട് കൊടകര കുഴൽപ്പണക്കേസ് തന്നെ കേൾക്കാനില്ല. ഇവരെല്ലാം തമ്മിൽ നീക്കുപോക്കുണ്ടെന്ന കാര്യം ഉറപ്പാണ്. അതുകൊണ്ട് ഈ സംഭവങ്ങളിൽ ജുഡീഷ്യൽ അന്വേഷണം കൊണ്ട് മാത്രമേ സത്യം പുറത്തുവരൂ. അക്കാര്യം ഇന്ന് പ്രതിപക്ഷ നേതാവ് സൂചിപ്പിക്കുകയും ചെയ്തിട്ടുണ്ട്. ഈ കേസുകൾ ഇല്ലാതാക്കാൻ എത്ര ശ്രമിച്ചാലും ശക്തമായി നേരിടും. ഇപ്പോൾ കോവിഡ് വ്യാപനം കാരണമാണ് കോൺഗ്രസ് പ്രത്യക്ഷ സമരത്തിനിറങ്ങാത്തത്. അതൊരു ലൈസൻസായി കാണരുതെന്നും അദ്ദേഹം പറഞ്ഞു.