സിഎംആര്‍എല്‍ മാസപ്പടി ഇടപാടുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയന്റെ മകള്‍ വീണ വിജയനെതിരെയുള്ള അന്വേഷണം ഇഡി വീണ്ടും ഊര്‍ജിതമാക്കി. വരും ദിവസങ്ങളില്‍ വീണയ്ക്ക് ചോദ്യം ചെയ്യലിന് ഹാജരാകാന്‍ ഇഡി വീണ്ടും നോട്ടീസ് നല്‍കിയേക്കും. ലേക്കര്‍ ഇന്ത്യ, സൊളാസ് എന്നീ കമ്പനികളുമായി നടന്നിട്ടുള്ള പണമിടപാടുകളെക്കുറിച്ചും പരിശോധന നടന്നുവരികയാണ്.
കണ്ടെത്തിയ കയ്യെഴുത്ത് രേഖകളില്‍ നിന്നും ലഭിച്ച വിവരങ്ങളാണ് കേസില്‍ നിര്‍ണായക വഴിത്തിരിവായിരിക്കുന്നത്. പരിശോധനയില്‍ കണ്ടെടുത്ത ഡയറിയിലെ കയ്യെഴുത്ത് കുറിപ്പുകളില്‍ നിന്ന് ഏകദേശം 20 കോടി രൂപയുടെ സാമ്പത്തിക ഇടപാടുകളെക്കുറിച്ചുള്ള രേഖകള്‍ ഇഡിക്ക് ലഭിച്ചു. ഇതിന്റെ ഉറവിടവും പണം എങ്ങോട്ടാണ് കൈമാറ്റം ചെയ്തതെന്നും ഏജന്‍സി വിശദമായി പരിശോധിക്കുന്നു. ദുബായിലേക്ക് 85 ലക്ഷം രൂപ (3.49 ലക്ഷം ദിര്‍ഹം) അയച്ചതായി രേഖകളില്‍ കാണുന്നുണ്ട്. വിദേശത്തേക്ക് കൂടുതല്‍ തുക നിയമവിരുദ്ധമായി കൈമാറ്റം ചെയ്തിട്ടുണ്ടോ എന്ന കാര്യത്തിലും അന്വേഷണം നടക്കുന്നുണ്ട്. വീണ ഉപയോഗിച്ചിരുന്ന ഒരു സിം കാര്‍ഡിന്റെ വിവരങ്ങളും ഇഡി ശേഖരിച്ചിട്ടുണ്ട്. മന്ത്രി മുഹമ്മദ് റിയാസിന്റെ സുഹൃത്തും ഡിടിപിസി ഡെസ്റ്റിനേഷന്‍ മാനേജറുമായ നന്ദുലാലിന്റെ പേരിലുള്ളതാണ് ഈ സിം കാര്‍ഡ്. ഇന്റര്‍നെറ്റ് കോളുകള്‍ വഴിയുള്ള ആശയവിനിമയങ്ങള്‍ക്കായാണോ മറ്റൊരാളുടെ പേരിലുള്ള സിം കാര്‍ഡ് ഉപയോഗിച്ചത് എന്ന കാര്യവും അന്വേഷണപരിധിയിലുണ്ട്.
മാസപ്പടിക്കേസ്: വീണയ്ക്ക് ഇഡി സമന്‍സ് അയച്ചേക്കും; സാമ്പത്തിക ഇടപാടുകളില്‍ അന്വേഷണം ഊര്‍ജ്ജിതം
Jaihind TV News Report
Jaihind TV Web Desk
Updated Oct 11, 2026
2 min read
352 reads
