പാലക്കാട്: അട്ടപ്പാടി മേഖലയിലെ ആശങ്കാജനകമായ ശിശുമരണങ്ങളുടെ പശ്ചാത്തലത്തിൽ ആരോഗ്യസംവിധാനങ്ങൾ നേരിട്ട് വിലയിരുത്തുന്നതിനും അടിയന്തര നടപടികൾ ഉറപ്പാക്കുന്നതിനുമായി ആരോഗ്യ മന്ത്രി കെ. മുരളീധരൻ നാളെ (ഒക്ടോബർ 31) അട്ടപ്പാടി സന്ദർശിക്കും. രാവിലെ 9.30-ന് കോട്ടത്തറ ട്രൈബൽ സ്പെഷ്യാലിറ്റി ആശുപത്രി സന്ദർശിക്കുന്ന മന്ത്രി, ആരോഗ്യവകുപ്പ് ഉദ്യോഗസ്ഥരുടെ അടിയന്തര യോഗം വിളിച്ചുചേർക്കും.
തുടർന്ന് രാവിലെ 11-ന് അഗളി സാമൂഹികാരോഗ്യ കേന്ദ്രത്തിലെത്തി ആരോഗ്യപ്രവർത്തകരുമായി ചർച്ച നടത്തി പ്രതിരോധ പ്രവർത്തനങ്ങൾ അവലോകനം ചെയ്യും. മേഖലയിലെ അടിസ്ഥാനപരമായ ആരോഗ്യപ്രശ്നങ്ങൾക്ക് ശാശ്വത പരിഹാരം കാണാനാണ് സർക്കാർ ശ്രമിക്കുന്നതെന്ന് മന്ത്രി വ്യക്തമാക്കി.
മന്ത്രിയുടെ പ്രത്യേക നിർദേശപ്രകാരം ആരോഗ്യവകുപ്പ് ഡയറക്ടറേറ്റും മെഡിക്കൽ വിദ്യാഭ്യാസ വകുപ്പും ചേർന്നുള്ള വിദഗ്ധസംഘം മൂന്ന് ദിവസത്തെ തീവ്ര പഠനത്തിനായി ഇന്നലെ അട്ടപ്പാടിയിലെത്തിയിട്ടുണ്ട്. സംസ്ഥാന ട്രൈബൽ ഹെൽത്ത് നോഡൽ ഓഫീസർ ഡോ. ഹരികുമാർ, ദേശീയ ആരോഗ്യദൗത്യത്തിന്റെ മാതൃ-ശിശു ആരോഗ്യ നോഡൽ ഓഫീസർ ഡോ. ജോയ് ജോൺ, ആരോഗ്യവകുപ്പ് അസിസ്റ്റന്റ് ഡയറക്ടർ ഡോ. ലിപ്സി പോൾ എന്നിവരാണ് ആരോഗ്യവകുപ്പിൽ നിന്നുള്ള സംഘത്തിലുള്ളത്. കൂടാതെ തിരുവനന്തപുരം എസ്.എ.ടി ആശുപത്രി സൂപ്രണ്ട് ഡോ. റിയാസ്.ഐയുടെ നേതൃത്വത്തിൽ ജനറ്റിക്സ്, പീഡിയാട്രിക്, ഗൈനക്കോളജി തുടങ്ങി വിവിധ മേഖലകളിലെ ഏഴ് പ്രമുഖ വിദഗ്ധ ഡോക്ടർമാരും സംഘത്തിലുണ്ട്.
വിദഗ്ധ സംഘം അട്ടപ്പാടിയിലെ വിവിധ ഊരുകൾ, കുടുംബാരോഗ്യ കേന്ദ്രങ്ങൾ, ഉപകേന്ദ്രങ്ങൾ എന്നിവ സന്ദർശിച്ച് ഗർഭിണികളെയും അഞ്ച് വയസ്സിൽ താഴെയുള്ള കുട്ടികളെയും നേരിട്ട് പരിശോധിച്ച് ആവശ്യമായ ചികിത്സ ഉറപ്പാക്കും. 2026-ൽ മേഖലയിൽ റിപ്പോർട്ട് ചെയ്ത മുഴുവൻ നവജാതശിശു, ബാലമരണങ്ങൾ കേന്ദ്രീകരിച്ച് മരണ ഓഡിറ്റും സംഘം നടത്തുന്നതാണ്. പഠനത്തിന് ശേഷം തയാറാക്കുന്ന സമഗ്ര റിപ്പോർട്ട് ഒരാഴ്ചയ്ക്കകം സമർപ്പിക്കാൻ നിർദ്ദേശിച്ചിട്ടുണ്ട്. ഇതിന്റെ അടിസ്ഥാനത്തിലാകും തുടർനടപടികൾ സ്വീകരിക്കുക.
