മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ പ്രധാനമന്ത്രി നരേന്ദ്ര മോദിയുടെയും അമിത് ഷായുടെയും ചട്ടുകമായി മാറിയിരിക്കുകയാണെന്ന് രാജ്‌മോഹൻ ഉണ്ണിത്താൻ എം.പി ആരോപിച്ചു. തെരഞ്ഞെടുപ്പ് കമ്മീഷന്റെ സ്വയംഭരണാവകാശം തകർത്ത് അതിനെ ബി.ജെ.പിയുടെ പോഷക സംഘടനയാക്കി മാറ്റുകയാണ്. ഒരു ഏകാധിപതിയെപ്പോലെയാണ് നിലവിൽ മുഖ്യ തെരഞ്ഞെടുപ്പ് കമ്മീഷണർ പ്രവർത്തിക്കുന്നതെന്നും അദ്ദേഹം കടുപ്പിച്ച് വിമർശിച്ചു.
മോദി സർക്കാരിന്റെ താളത്തിനൊത്ത് തുള്ളുന്ന അവസ്ഥയിലേക്ക് തെരഞ്ഞെടുപ്പ് കമ്മീഷൻ അധഃപതിച്ചുവെന്ന് വ്യക്തമാക്കിയ എം.പി, ഭരണകൂടത്തിന്റെ വിശ്വസ്തനായ വളർത്തുനായയെപ്പോലെയാണ് കമ്മീഷണറുടെ പ്രവർത്തനമെന്നും കുറ്റപ്പെടുത്തി. തെരഞ്ഞെടുപ്പ് കമ്മീഷന്റെ വിശ്വാസ്യത വീണ്ടെടുക്കാൻ അടിയന്തര ഇടപെടലുകൾ അനിവാര്യമാണെന്ന് അദ്ദേഹം ചൂണ്ടിക്കാട്ടി.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ ഉടൻ സ്ഥാനത്തുനിന്ന് പുറത്താക്കുക, തെരഞ്ഞെടുപ്പ് കമ്മീഷന്റെ പ്രവർത്തനങ്ങളിൽ നിഷ്പക്ഷത ഉറപ്പുവരുത്തുക തുടങ്ങിയ ആവശ്യങ്ങൾ ഉന്നയിച്ചായിരുന്നു പ്രതിഷേധം. കണ്ണൂർ ജില്ലാ കോൺഗ്രസ് കമ്മിറ്റിയുടെ (DCC) നേതൃത്വത്തിൽ കണ്ണൂർ ആർ.എം.എസ് ഓഫിസിലേക്ക് നടത്തിയ ബഹുജന മാർച്ച് ഉദ്ഘാടനം ചെയ്ത് സംസാരിക്കുകയായിരുന്നു രാജ്‌മോഹൻ ഉണ്ണിത്താൻ.
