വഴിക്കടവില്‍ ഷോക്കേറ്റ് മരിച്ച അനന്തുവിന്റെ മരണത്തില്‍ നിലമ്പൂരില്‍ ഇന്നും പ്രതിഷേധങ്ങള്‍ തുടരും. പ്രതിപക്ഷ നേതാവും യുഡിഎഫ് കണ്‍വീനറും ഇന്ന് വെള്ളക്കട്ടയിലെ അനന്തുവിന്റെ വീട് സന്ദര്‍ശിക്കും. സംഭവത്തില്‍ കെഎസ്ഇബിയുടെ ഭാഗത്തുണ്ടായ ഗുരുതര വീഴ്ച്ചക്കെതിരെ യുഡിഎഫ് വഴിക്കടവ് കെഎസ്ഇബി ഓഫീസിലേക്ക് മാര്‍ച്ച് നടത്തും. കഴിഞ്ഞ ദിവസം വിലകുറഞ്ഞ രാഷ്ട്രീയ ആരോപണമുയര്‍ത്തിയ വനംമന്ത്രിയും ഇന്ന് വഴിക്കടവില്‍ എത്തിയേക്കും.
ഇതിനിടയില്‍ കുടുംബയോഗങ്ങളുമായി നിലമ്പൂരില്‍ യുഡിഎഫ് പ്രചരണം മൂന്നാം ഘട്ടത്തിലേക്ക് കടന്നു. ബൂത്ത് തലത്തില്‍ കുടുംബയോഗങ്ങള്‍ ഇന്ന് മുതല്‍ ആരംഭിക്കും. സ്ഥാനാര്‍ത്ഥിയുടെ പഞ്ചായത്ത് തല സ്വീകരണ പരിപാടിയും തുടരുകയാണ്. മൂത്തേടം, പാലങ്കരയില്‍ മുന്‍ കെപിസിസി പ്രസിഡന്റ് കെ മുരളീധരന്‍ രാവിലെ പര്യടന പരിപാടി ഉദ്ഘാടനം ചെയ്യും. വൈകിട്ട് പോത്തുകല്‍ ടൗണില്‍ പി കെ കുഞ്ഞാലിക്കുട്ടി സ്ഥാനാര്‍ഥി പര്യടനത്തിന്റെ സമാപനം ഉദ്ഘാടനം ചെയ്യും.
