ബില്ലുകള്‍ നിയമമാക്കി തമിഴ്‌നാട് സര്‍ക്കാര്‍. ഗവര്‍ണറുടെ അനുമതിയില്ലാതെയാണ് തമിഴ്‌നാട് സര്‍ക്കാര്‍ ബില്ലുകള്‍ നിയമമാക്കിയത്. സുപ്രീം കോടതിയുടെ വിധിക്കു പിന്നാലെയാണ് സര്‍ക്കാരിന്റെ ഈ നീക്കം. സുപ്രീം കോടതി ഉത്തരവിലൂടെ പത്ത് ബില്ലുകളാണ് നിയമമാക്കിയത്. ഇതോടെ ഗവര്‍ണറുടെയോ രാഷ്ട്രപതിയുടെയോ ഒപ്പില്ലാതെ ബില്ലുകള്‍ നിയമമാകുന്നത് ഇതാദ്യമാണ്.
കഴിഞ്ഞ ദിവസമാണ് തമിഴ്‌നാട് സര്‍ക്കാര്‍ നല്‍കിയ ഹര്‍ജിയില്‍ സുപ്രീം കോടതി ഉത്തരവിറക്കിയത്. ബില്ലുകള്‍ക്ക് സമയപരിധി നിശ്ചയിക്കുകയും മൂന്ന് മാസത്തിനുള്ളില്‍ തീരുമാനമെടുക്കണമെന്നും കോടതി നിര്‍ദേശിച്ചു. ഗവര്‍ണര്‍ക്ക് പുറമെയാണ് രാഷ്ട്രപതിക്കും കോടതി ഉത്തരവ് നല്‍കിയത്. മുന്നില്‍ വരുന്ന ബില്ലുകള്‍ക്ക് മൂന്ന് മാസത്തിനുള്ളില്‍ തീര്‍പ്പ് കല്‍പിക്കണമെന്നും അല്ലാത്ത പക്ഷം കാരണം വ്യക്തമാക്കണമെന്നുമാണ് കോടതി പറഞ്ഞത്. ഇതിനെതിരെ കേരള ഗവര്‍ണര്‍ രംഗത്ത് എത്തിയിരുന്നു. ഭരണഘടന മാറ്റങ്ങള്‍ തീരുമാനിക്കുന്നത് പാര്‍ലമെന്റാണെന്നും ഇക്കാര്യത്തില്‍ ഇടപെടാന്‍ ജഡ്ജിമാര്‍ക്ക് അവകാശമില്ലെന്നുമായിരുന്നു ഗവര്‍ണറുടെ വിമര്‍ശനം.
