വടക്കൻ കേരളത്തിൽ മഴ ശക്തമാകുന്നു: കണ്ണൂരും കാസർകോടും ഓറഞ്ച് അലർട്ട്; കോഴിക്കോട് രാത്രിയാത്രയ്ക്ക് നിയന്ത്രണം

വടക്കൻ കേരളത്തിൽ വരും മണിക്കൂറുകളിൽ മഴ ശക്തമാകുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി. ജാഗ്രതയുടെ ഭാഗമായി കണ്ണൂർ, കാസർകോട് ജില്ലകളിൽ ഓറഞ്ച് അലർട്ടും, തിരുവനന്തപുരം, മലപ്പുറം, കോഴിക്കോട്, വയനാട് എന്നീ ജില്ലകളിൽ യെല്ലോ അലർട്ടും പ്രഖ്യാപിച്ചു. ഇന്ന് ഉച്ചയ്ക്ക് ശേഷം കോഴിക്കോടിന്റെ മലയോര മേഖലകളിൽ ശക്തമായ മഴയാണ് പെയ്യുന്നത്.

മഴ കനത്തതോടെ കോഴിക്കോട് ജില്ലയിലെ മലയോര മേഖലകളിലേക്കും ഉയർന്ന പ്രദേശങ്ങളിലേക്കുമുള്ള അത്യാവശ്യമല്ലാത്ത എല്ലാ രാത്രിയാത്രകളും ജില്ലാ കളക്ടർ വിലക്കി. ബംഗാൾ ഉൾക്കടലിൽ രൂപപ്പെട്ട തീവ്ര ന്യൂനമർദത്തിന്റെ ഫലമായി കനത്ത മഴയ്ക്കും ശക്തമായ കാറ്റിനും സാധ്യതയുണ്ട്. ഉരുൾപൊട്ടൽ, മണ്ണിടിച്ചിൽ, മരം വീഴൽ, പെട്ടെന്നുണ്ടാകുന്ന വെള്ളപ്പൊക്കം എന്നിവയ്ക്ക് സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് ജില്ലാ ദുരന്തനിവാരണ അതോറിറ്റി നിർദേശിച്ചു.

മണ്ണിടിച്ചിൽ ഭീഷണിയുള്ള താമരശ്ശേരി, തിരുവമ്പാടി, കൂരാച്ചുണ്ട് തുടങ്ങിയ മലയോര റോഡുകളിൽ ഗതാഗതം പൂർണമായി നിയന്ത്രിക്കും. അതേസമയം, ദുരന്തനിവാരണ ആവശ്യങ്ങൾക്കുള്ള അടിയന്തര വാഹനങ്ങൾക്ക് ഈ നിയന്ത്രണത്തിൽ ഇളവുണ്ടായിരിക്കും. അപകടസാധ്യത മുന്നിൽ കണ്ട് നദികൾ, ക്വാറികൾ, വിനോദസഞ്ചാര കേന്ദ്രങ്ങൾ, കടൽത്തീരങ്ങൾ എന്നിവിടങ്ങളിൽ വിനോദത്തിനായി ഇറങ്ങുന്നതും മീൻപിടിക്കുന്നതും കർശനമായി നിരോധിച്ചിട്ടുണ്ട്.

അപകടസാധ്യതയുള്ള പ്രദേശങ്ങളിൽ താമസിക്കുന്നവരെ സുരക്ഷിത കേന്ദ്രങ്ങളിലേക്കോ ദുരിതാശ്വാസ ക്യാമ്പുകളിലേക്കോ ഉടനടി മാറ്റിപ്പാർപ്പിക്കാൻ തദ്ദേശ സ്വയംഭരണ സ്ഥാപനങ്ങൾക്കും വില്ലേജ് ഓഫീസർമാർക്കും നിർദേശം നൽകി. ഹെൽപ്‌ലൈൻ നമ്പറുകളും ക്യാമ്പുകളുടെ വിവരങ്ങളും പ്രാദേശികമായി ലഭ്യമാക്കും. ദുരന്തനിവാരണ നിയമപ്രകാരമുള്ള ഈ നിർദേശങ്ങൾ ലംഘിക്കുന്നവർക്കെതിരെ കർശനമായ നിയമനടപടി സ്വീകരിക്കുമെന്നും അധികൃതർ വ്യക്തമാക്കി.