കർണാടക രാഷ്ട്രീയത്തിൽ നിർണായക വഴിത്തിരിവ്. മുഖ്യമന്ത്രി സിദ്ധരാമയ്യ രാജി സ്ഥിരീകരിക്കുകയും ലോക്ഭവനിലെത്തി രാജി സമർപ്പിക്കുകയും ചെയ്തു. ഗവർണർ സ്ഥലത്തില്ലാതിരുന്നതിനെ തുടർന്ന് ഓഫീസിലാണ് രാജിക്കത്ത് ഏൽപ്പിച്ചത്. കോൺഗ്രസ് ഹൈക്കമാൻഡ് ആവശ്യപ്പെട്ടതിനാലാണ് താൻ പദവി ഒഴിഞ്ഞതെന്ന് സിദ്ധരാമയ്യ ഔദ്യോഗികമായി പ്രതികരിച്ചു. പാർട്ടി നേതൃത്വം ആവശ്യപ്പെട്ടാൽ എപ്പോൾ വേണമെങ്കിലും രാജിവെക്കാൻ താൻ നേരത്തെ തന്നെ തയ്യാറായിരുന്നുവെന്നും അദ്ദേഹം കൂട്ടിച്ചേർത്തു.
പുതിയ മുഖ്യമന്ത്രിയായി ചുമതലയേൽക്കാനൊരുങ്ങുന്ന ഉപമുഖ്യമന്ത്രി ഡി.കെ. ശിവകുമാറിനൊപ്പമാണ് സിദ്ധരാമയ്യ ലോക്ഭവനിലെത്തിയത്. മുതിർന്ന നേതാവ് ജി. പരമേശ്വരയും ഇവരെ അനുഗമിച്ചിരുന്നു. രാജിക്ക് പിന്നാലെ വൈകിട്ട് സിദ്ധരാമയ്യ ബെംഗളൂരുവിൽ നിന്ന് ഡൽഹിയിലേക്ക് തിരിക്കും.
അതേസമയം, ഹൈക്കമാൻഡ് മുന്നോട്ടുവെച്ച രാജ്യസഭാ സീറ്റ് വാഗ്ദാനം താൻ സ്നേഹത്തോടെ നിരസിക്കുകയാണെന്ന് സിദ്ധരാമയ്യ വ്യക്തമാക്കി. കേന്ദ്ര രാഷ്ട്രീയത്തിലേക്ക് മാറാൻ താല്പര്യമില്ലെന്നും കർണാടക സംസ്ഥാന രാഷ്ട്രീയത്തിൽ തന്നെ സജീവമായി തുടരുമെന്നും അദ്ദേഹം അറിയിച്ചു. അടുത്ത മുഖ്യമന്ത്രി ആരാകണമെന്നത് സംബന്ധിച്ച് ഹൈക്കമാൻഡ് കൃത്യമായ തീരുമാനം കൈക്കൊള്ളുമെന്നും അദ്ദേഹം പറഞ്ഞു.
