ന്യൂഡല്‍ഹി: ജന്തര്‍ മന്തറിലെ നിരോധിക്കപ്പെട്ട പ്രതിഷേധ സ്ഥലത്ത് അതിക്രമിച്ചു കയറിയ കേസില്‍ സി.ജെ.പി. വക്താക്കളായ സൗരവ് ദാസ്, ആശുതോഷ് റങ്ക എന്നിവരുടെ ജുഡീഷ്യല്‍ കസ്റ്റഡി കോടതി രണ്ടു ദിവസത്തേക്കുകൂടി നീട്ടി. മന്ദിര്‍ മാര്‍ഗ് പൊലീസ് സ്റ്റേഷനിലെ സ്പെഷ്യല്‍ എക്സിക്യൂട്ടീവ് മജിസ്ട്രേറ്റാണ് ഉത്തരവിട്ടത്.
ഒക്ടോബര്‍ 11-ലെ ബോണ്ട് വ്യവസ്ഥകള്‍ ഇരുവരും മനഃപൂര്‍വം ലംഘിച്ചുവെന്നും, അനുമതിയില്ലാത്ത സ്ഥലങ്ങളില്‍ തുടര്‍ച്ചയായി സമരങ്ങള്‍ സംഘടിപ്പിക്കുന്നത് നിയമത്തോടുള്ള അനാദരവാണെന്നും കോടതി കുറ്റപ്പെടുത്തി. അതേസമയം, രാജ്യത്ത് അടിയന്തരാവസ്ഥയ്ക്ക് സമാനമായ സാഹചര്യമാണെന്നും നീതി ലഭിക്കുന്നില്ലെന്നും കോടതിയില്‍നിന്ന് പുറത്തിറങ്ങവെ സൗരവ് ദാസ് ആരോപിച്ചു. ഇത് ഒരു 'പോലീസ് കോടതി'യാണെന്നും അദ്ദേഹം മാധ്യമങ്ങളോട് പ്രതികരിച്ചു. ഒക്ടോബര്‍ 13-നാണ് ജന്തര്‍ മന്തറിലെ പൂട്ടിയിട്ടിരുന്ന ഗേറ്റുകള്‍ ചാടിക്കടന്ന് അതിക്രമിച്ചു കയറിയതിന് സൗരവ് ദാസ്, ആശുതോഷ് റങ്ക, അജിന്‍ക്യ ഷിന്‍ഡെ എന്നിവരെ പൊലീസ് കസ്റ്റഡിയിലെടുത്തത്. അജിന്‍ക്യ ഷിന്‍ഡെയെ പിന്നീട് ജാമ്യത്തില്‍ വിട്ടയച്ചിരുന്നു.
'രാജ്യത്ത് അടിയന്തരാവസ്ഥ'; നീതി ലഭിക്കുന്നില്ലെന്ന് സൗരവ് ദാസ്; സിജെപി നേതാക്കളുടെ കസ്റ്റഡി നീട്ടി
Jaihind TV News Report
Jaihind TV Web Desk
2 min read
149 reads
