ന്യൂഡൽഹി: ഇന്റർനെറ്റ് കണക്റ്റിവിറ്റിയോ സ്മാർട്ട്ഫോണോ ഇല്ലാതെ ഫീച്ചർ ഫോണുകൾ വഴി യുപിഐ ഇടപാടുകൾ നടത്താൻ കഴിയുന്ന പുതിയ സേവനം അവതരിപ്പിച്ച് ഫോൺപേ. ‘ഫോൺപേ യുപിഐ 123Pay’ എന്ന പേരിലുള്ള സേവനം രാജ്യത്തെ ദശലക്ഷക്കണക്കിന് ഫീച്ചർ ഫോൺ ഉപയോക്താക്കൾക്ക് ഡിജിറ്റൽ പണമിടപാടുകൾ കൂടുതൽ എളുപ്പമാക്കുക എന്ന ലക്ഷ്യത്തോടെയാണ് അവതരിപ്പിച്ചിരിക്കുന്നത്.
എസ്എംഎസ്, ഐവിആർ സാങ്കേതികവിദ്യകളുടെ സഹായത്തോടെയാണ് പുതിയ സംവിധാനം പ്രവർത്തിക്കുന്നത്. ഇന്റർനെറ്റ് കണക്റ്റിവിറ്റി ലഭ്യമല്ലാത്തതോ ദുർബലമായതോ ആയ ഗ്രാമീണ മേഖലകളിലുൾപ്പെടെ ഇതുവഴി തടസ്സമില്ലാതെ യുപിഐ ഇടപാടുകൾ നടത്താനാകും. രാജ്യത്തെ ഏകദേശം 20 കോടി ഫീച്ചർ ഫോൺ ഉപയോക്താക്കൾക്ക് പുതിയ സേവനത്തിന്റെ പ്രയോജനം ലഭിക്കുമെന്നാണ് വിലയിരുത്തൽ.
സ്മാർട്ട്ഫോണിലെ ഫോൺപേ സേവനത്തിന് സമാനമായി വിവിധ യുപിഐ ഇടപാടുകൾ നടത്താൻ ഫീച്ചർ ഫോൺ ഉപയോക്താക്കൾക്കും പുതിയ സംവിധാനത്തിലൂടെ സാധിക്കും. കടകളിൽ സാധനങ്ങൾ വാങ്ങിയ ശേഷം ക്യുആർ കോഡ് സ്കാൻ ചെയ്ത് പണമടയ്ക്കൽ, വ്യക്തികൾ തമ്മിലുള്ള പണമിടപാട്, ഇടപാട് വിവരങ്ങൾ പരിശോധിക്കൽ തുടങ്ങിയ സൗകര്യങ്ങളും ലഭ്യമാകും.
ഇന്റർനെറ്റ് സൗകര്യം പരിമിതമായ പ്രദേശങ്ങളിലെ ഉപയോക്താക്കൾക്കും ഡിജിറ്റൽ പേയ്മെന്റ് സംവിധാനത്തിലേക്ക് കൂടുതൽ എളുപ്പത്തിൽ പ്രവേശനം ഉറപ്പാക്കുന്നതാണ് ‘ഫോൺപേ യുപിഐ 123Pay’യുടെ പ്രധാന ലക്ഷ്യം. രാജ്യത്തെ ഡിജിറ്റൽ സാമ്പത്തിക ഇടപാടുകളുടെ വ്യാപ്തി കൂടുതൽ വർധിപ്പിക്കുന്നതിനും പുതിയ സേവനം സഹായിക്കുമെന്നാണ് പ്രതീക്ഷ.
