കളിക്കളത്തിനപ്പുറവും മെസ്സി മാജിക്; പുതുതായി കണ്ടെത്തിയ ചെടിക്ക് 'സാൽവിയ മെസ്സി' എന്ന് പേരിട്ട് ഗവേഷകർ

ഫുട്‌ബോൾ ലോകത്ത് ഏതാണ്ട് എല്ലാ പ്രധാന ബഹുമതികളും സ്വന്തമാക്കിയ അർജന്റീന ഇതിഹാസം ലയണൽ മെസ്സിക്ക് ശാസ്ത്ര ലോകത്തുനിന്ന് അപൂർവ ആദരം. പുതുതായി കണ്ടെത്തിയ ഒരു സസ്യ ഇനത്തിന് മെസ്സിക്കുള്ള ആദരവായി അദ്ദേഹത്തിന്റെ പേര് നൽകിയിരിക്കുകയാണ് ഗവേഷകർ. 'സാൽവിയ മെസ്സി' (Salvia messii) എന്നാണ് ഈ പുതിയ സസ്യത്തിന് നൽകിയിരിക്കുന്ന പേര്.

പെറുവിലെ മധ്യ, തെക്കൻ ആന്തിസ് പർവ്വതനിരകളിലാണ് ഈ സസ്യം കണ്ടുവരുന്നത്. അർജന്റീന ദേശീയ ടീമിന്റെ ജേഴ്‌സിയുടെ നിറങ്ങളോട് സാമ്യമുള്ള വെള്ളയും ഇളം നീലയും നിറത്തിലുള്ള പൂക്കളാണ് ഇതിനുള്ളത്. 2005-ൽ സീനിയർ ടീമിൽ അരങ്ങേറ്റം കുറിച്ചതുമുതൽ മെസ്സി അണിയുന്ന പരമ്പരാഗത അർജന്റീന ഫുട്‌ബോൾ കിറ്റിന്റെ നിറങ്ങളെ അനുസ്മരിപ്പിക്കുന്ന ഈ പൂക്കളാണ് സസ്യത്തിന് മെസ്സിയുടെ പേരുനൽകാൻ ശാസ്ത്രജ്ഞർക്ക് പ്രചോദനമായത്.

സസ്യ വർഗ്ഗീകരണത്തിൽ ശ്രദ്ധ കേന്ദ്രീകരിക്കുന്ന അന്താരാഷ്ട്ര ജേണലായ 'ഫൈറ്റോടാക്‌സ'യുടെ (Phytotaxa) ഒക്ടോബർ പതിപ്പിലാണ് ഈ കണ്ടെത്തൽ രേഖപ്പെടുത്തിയിരിക്കുന്നത്. വളരെ പരിമിതമായ ഭൂമിശാസ്ത്രപരമായ വിസ്തൃതിയിൽ മാത്രം കണ്ടുവരുന്നതിനാൽ ഗവേഷകർ ഈ സസ്യത്തെ വംശനാശഭീഷണി നേരിടുന്നവയുടെ വിഭാഗത്തിലാണ് ഉൾപ്പെടുത്തിയിരിക്കുന്നത്.

വ്യക്തികളോടുള്ള ആദരസൂചകമായി ജീവിവർഗ്ഗങ്ങൾക്ക് പേരിടുന്ന സസ്യശാസ്ത്രപരമായ നാമകരണ രീതി പിന്തുടർന്നാണ് ഈ പേര് നൽകിയിരിക്കുന്നത്. ഇതിൽ 'സാൽവിയ' എന്നത് ജീനസ് നാമവും 'മെസ്സി' എന്നത് അർജന്റീന ഫുട്‌ബോളർക്കുള്ള ആദരവുമാണ്. ഗോളുകളും ട്രോഫികളും വ്യക്തിഗത റെക്കോഡുകളും നിറഞ്ഞ മെസ്സിയുടെ കരിയറിന്, സസ്യശാസ്ത്ര രേഖകളിൽ സ്ഥാനം പിടിച്ചതിലൂടെ വേറിട്ടൊരു അംഗീകാരം കൂടിയാണ് ഇപ്പോൾ ലഭിച്ചിരിക്കുന്നത്.