പ്രയാഗ്‌രാജിൽ മോദിയുടെ കുംഭസ്നാനം: പിന്നില്‍ രാഷ്ട്രീയ ലക്ഷ്യമോ?

ഉത്തർപ്രദേശിലെ പ്രയാഗ്‌രാജിൽ നടക്കുന്ന മഹാകുംഭമേളയിൽ പങ്കെടുക്കാൻ പ്രധാനമന്ത്രി നരേന്ദ്ര മോദി തിരഞ്ഞെടുത്തത് ഡൽഹി നിയമസഭാ തിരഞ്ഞെടുപ്പ് നടക്കുന്ന അതേ ദിവസം. ഈ സമയം കൃത്യമായി തിരഞ്ഞെടുക്കപ്പെട്ടതാണോ എന്നതിനെ കുറിച്ച് രാഷ്ട്രീയമണ്ഡലങ്ങളിൽ ചർച്ചകൾ ആരംഭിച്ചിട്ടുണ്ട്. ഹിന്ദുത്വ വോട്ടുകളെ കയ്യിൽ പിടിക്കാനും ദേശീയ മാധ്യമങ്ങളിലെ ശ്രദ്ധ നിലനിർത്താനുമുള്ള നീക്കമാണോ എന്ന സംശയമാണ് ഉയരുന്നത്. ഡൽഹിയിൽ തിരഞ്ഞെടുപ്പ് പ്രചാരണം ആവേശഭരിതമായിരുന്നു. മൂന്നാംവട്ടം അധികാരത്തിൽ തുടരാൻ ആം ആദ്മി പാർട്ടിയും, അധികാരം പിടിച്ചെടുക്കാൻ കോണ്‍ഗ്രസും ബിജെപിയും കടുത്ത പോരാട്ടത്തിലാണ്. ഈ സാഹചര്യത്തിൽ, പ്രധാനമന്ത്രി മോദിയുടെ കുംഭമേളയിലെ പുണ്യസ്നാനം ഗംഭീരമായ രാഷ്ട്രീയ പ്രചാരണം എന്ന് തന്നെ പറയേണ്ടി വരും. മാധ്യമങ്ങളിൽ വലിയ പ്രചാരം നേടാനായിരിക്കും മോദിയുടെ ഈ സന്ദർശനം. കഴിഞ്ഞ പാർലമെന്‍റ് തിരഞ്ഞെടുപ്പിന് മുൻപ് കന്യാകുമാരിയിൽ ധ്യാനമിരുന്ന മോദി, ഇപ്പോൾ കുംഭസ്നാനത്തിലൂടെ വീണ്ടും ഹിന്ദുത്വ ഭാവത്തിൽ പ്രത്യക്ഷപ്പെടുന്നു. മധ്യവർഗ്ഗത്തിന് വേണ്ടി നികുതി ഇളവുകൾ പ്രഖ്യാപിച്ച ബിജെപി, ഹിന്ദുത്വ ബഹുമതിയെ ഉദ്ദേശിച്ചുള്ള രാഷ്ട്രീയ നീക്കവും ഇതോടൊപ്പം മുന്നോട്ട് കൊണ്ടുപോകുന്നുവെന്ന് രാഷ്ട്രീയ നിരീക്ഷകർ അഭിപ്രായപ്പെടുന്നു.