കൊച്ചി: പ്രശസ്ത ഡിജിറ്റൽ ക്രിയേറ്ററും നടനുമായ അനന്തരാമൻ അജയ് ആദ്യമായി സംവിധാനം ചെയ്ത ഹ്രസ്വചിത്രം 'ഗ്രാനി' പുറത്തിറങ്ങി. മികച്ച സാങ്കേതിക നിലവാരവും പ്രേക്ഷകരെ ആകാംഷയുടെ മുനമ്പിൽ നിർത്തുന്ന കഥാപരിസരവുമാണ് ചിത്രത്തിന്റെ പ്രധാന ആകർഷണം. ശിവരാജ്, മുതിർന്ന നടി കെ.പി.എ.സി. ലീല എന്നിവരാണ് ചിത്രത്തിൽ കേന്ദ്ര കഥാപാത്രങ്ങളായി എത്തിയിരിക്കുന്നത്.
പൂർണ്ണമായും ഹൊറർ മിസ്റ്ററി മൂഡിൽ ഒരുക്കിയിരിക്കുന്ന ചിത്രത്തിന്റെ ദൈർഘ്യം 40 മിനിറ്റാണ്. ഒറ്റയ്ക്ക് താമസിക്കുന്ന ഒരു മുത്തശ്ശിയെ പരിചരിക്കാൻ എത്തുന്ന ഹോം നഴ്സായ റോണി എന്ന യുവാവിന്റെ ജീവിതവും തുടർന്ന് ആ വീട്ടിൽ അരങ്ങേറുന്ന അസ്വാഭാവികമായ സംഭവങ്ങളുമാണ് ചിത്രം പറയുന്നത്. റോണിയായി ശിവരാജും മുത്തശ്ശിയായി കെ.പി.എ.സി ലീലയും തങ്ങളുടെ കരിയറിലെ തന്നെ മികച്ച പ്രകടനമാണ് ചിത്രത്തിൽ കാഴ്ചവെച്ചിരിക്കുന്നത്. ഒരു നിമിഷം പോലും ബോറടിപ്പിക്കാതെ പ്രേക്ഷകരെ പിടിച്ചിരുത്തുന്ന ചിത്രത്തിന്റെ ക്ലൈമാക്സ് ഏറെ ഗംഭീരമാണ്.
ചിത്രത്തിന്റെ രചനയും സംവിധാനവും നിർവ്വഹിച്ചിരിക്കുന്നത് അനന്തരാമൻ അജയ് തന്നെയാണ്. വിജയ് രഘു കൃഷ്ണൻ ഛായാഗ്രഹണവും മിഥുൻ മുരളി എഡിറ്റിങ്ങും നിർവ്വഹിച്ചിരിക്കുന്നു. 'ആർക്കി'യാണ് ചിത്രത്തിന് പശ്ചാത്തല സംഗീതം ഒരുക്കിയത്. പ്രൊഡക്ഷൻ ഡിസൈനർ: ഹംസ വള്ളിത്തോട്, ക്രിയേറ്റീവ് ഡയറക്ടർ: സംഗീത് ശ്യാം, സൗണ്ട് ഡിസൈൻ: അജയൻ അടാട്ട്, ശബ്ദമിശ്രണം: പയസ്മോൻ സണ്ണി, കോസ്റ്റ്യൂം: രഞ്ജിനി മേരി റെജി, മേക്കപ്പ്: പ്രദീപ് വിതുര, കളർ ഗ്രേഡിങ്: ജോയ്നർ തോമസ്, വിഎഫ്എക്സ്: ബോബി രാജൻ, പോസ്റ്റർ ഡിസൈൻ: കൃഷ്ണ ബാല ഷേണായി, പി.ആർ.ഒ: വൈശാഖ് സി. വടക്കേവീട്, ജിനു അനിൽകുമാർ എന്നിവരാണ് മറ്റ് അണിയറ പ്രവർത്തകർ.
