'പിണറായി വിജയൻ കേരളത്തിലെ ഏറ്റവും മികച്ച ബിജെപിക്കാരൻ; എസ്ഡിപിഐ നേതാക്കളെ വിട്ടയക്കാൻ ഡീൽ'; വേങ്ങരയിൽ ആഞ്ഞടിച്ച് കെ.എം. ഷാജി

Jaihind TV Web Desk

March 31, 2026

1 min read • Updated: June 02, 2026

'പിണറായി വിജയൻ കേരളത്തിലെ ഏറ്റവും മികച്ച ബിജെപിക്കാരൻ; എസ്ഡിപിഐ നേതാക്കളെ വിട്ടയക്കാൻ ഡീൽ'; വേങ്ങരയിൽ ആഞ്ഞടിച്ച് കെ.എം. ഷാജി

എസ്ഡിപിഐ നേതാക്കൾക്കെതിരായ കേസുകൾ പിൻവലിക്കുന്നതുമായി ബന്ധപ്പെട്ട് സിപിഎമ്മും ബിജെപിയും തമ്മിൽ രഹസ്യമായ രാഷ്ട്രീയ ധാരണയുണ്ടെന്ന് വേങ്ങരയിലെ യുഡിഎഫ് സ്ഥാനാർത്ഥി കെ.എം. ഷാജി ആരോപിച്ചു. വേങ്ങരയിൽ നടന്ന തിരഞ്ഞെടുപ്പ് പൊതുയോഗത്തിൽ സംസാരിക്കുകയായിരുന്നു അദ്ദേഹം. ജയിലിൽ കഴിയുന്ന എസ്ഡിപിഐ നേതാക്കളെ മോചിപ്പിക്കുന്നതിനായി കേന്ദ്ര സർക്കാരുമായി ഒത്തുതീർപ്പ് ചർച്ചകൾ നടത്താൻ മുഖ്യമന്ത്രി പിണറായി വിജയൻ മുൻകൈ എടുക്കുന്നുവെന്നാണ് ഷാജിയുടെ പ്രധാന ആക്ഷേപം.

നരേന്ദ്ര മോദിയോട് എസ്ഡിപിഐക്ക് വേണ്ടി സംസാരിക്കാൻ ഇന്ന് കേരളത്തിലുള്ള ഏറ്റവും വലിയ ബിജെപിക്കാരൻ പിണറായി വിജയനാണെന്ന് കെ.എം. ഷാജി പരിഹസിച്ചു. ഒരു രാഷ്ട്രീയ 'ഡീലിന്റെ' ഭാഗമായാണ് ഈ നീക്കങ്ങൾ നടക്കുന്നത്. എസ്ഡിപിഐയുടെ രാഷ്ട്രീയ പിന്തുണ വിലയ്ക്ക് വാങ്ങാനാണ് സിപിഎം ശ്രമിക്കുന്നതെന്നും, ഇതിനായി കേന്ദ്ര ഏജൻസികളെയും ബിജെപി ഭരണകൂടത്തെയും മുഖ്യമന്ത്രി സ്വാധീനിക്കുന്നുവെന്നും അദ്ദേഹം കൂട്ടിച്ചേർത്തു.

സിപിഎം കളിക്കുന്നത് 'തീക്കൊള്ളി' കൊണ്ടാണെന്നും ഇത്തരം വർഗീയ പ്രീണന രാഷ്ട്രീയത്തിന് കനത്ത വില നൽകേണ്ടി വരുമെന്നും ഷാജി മുന്നറിയിപ്പ് നൽകി. "നിങ്ങൾ കളിക്കുന്ന ഈ വർഗീയ കളിക്ക് വേങ്ങരയിലെ മനുഷ്യർ നൽകുന്ന പ്രഹരം താങ്ങാനുള്ള കെൽപ്പ് സിപിഎമ്മിനുണ്ടാവില്ല" എന്ന് അദ്ദേഹം പറഞ്ഞു. വർഗീയതയെ രാഷ്ട്രീയ ലാഭത്തിനായി ഉപയോഗിക്കുന്ന ഇടത് നയത്തിനെതിരെ വോട്ടർമാർ പ്രതികരിക്കുമെന്നും അദ്ദേഹം പ്രസംഗത്തിൽ വ്യക്തമാക്കി.