എൽ.എയുടെ ആദ്യ ഏഷ്യൻ-അമേരിക്കൻ മേയർ, കരേൻ ബാസിനെ അട്ടിമറിച്ച് കസേരയുറപ്പിച്ച് മലയാളി വംശജ നിത്യ രാമൻ

വാഷിങ്ടൺ: അമേരിക്കയിലെ ഏറ്റവും വലിയ നഗരങ്ങളിലൊന്നായ ലോസ് ആഞ്ചലസിന്റെ മേയറായി കേരളത്തിൽ ജനിച്ചുവളർന്ന നിത്യ രാമൻ തിരഞ്ഞെടുക്കപ്പെട്ടു. ലോസ് ആഞ്ചലസിന്റെ ചരിത്രത്തിലെ ആദ്യ ഏഷ്യൻ-അമേരിക്കൻ മേയർ എന്ന ചരിത്രനേട്ടമാണ് നിത്യ സ്വന്തമാക്കിയത്. നിലവിലെ മേയറും ഡെമോക്രാറ്റിക് പാർട്ടി നേതാവുമായ കരേൻ ബാസിനെ പരാജയപ്പെടുത്തിയാണ് നിത്യയുടെ വൻ വിജയം. 51.1 ശതമാനം വോട്ടുകൾ നേടിയാണ് 45-കാരിയായ നിത്യ വിജയം ഉറപ്പിച്ചത്.

തൃശ്ശൂർ സ്വദേശിയായ സുധയുടെയും തിരുവനന്തപുരം സ്വദേശിയായ വെങ്കിട്ടരാമന്റെയും മകളായി 1981-ലാണ് നിത്യയുടെ ജനനം. തിരുവനന്തപുരം കെൽട്രോണിൽ എഞ്ചിനീയറായിരുന്ന അച്ഛൻ ഉന്നതപഠനത്തിനായി അമേരിക്കയിലേക്ക് പോകുന്നതുവരെ തിരുവനന്തപുരത്തും പിന്നീട് തൃശ്ശൂരിലുമായിരുന്നു കുട്ടിക്കാലം. ആറാം വയസ്സിൽ കുടുംബത്തോടൊപ്പം പൂർണ്ണമായി അമേരിക്കയിലേക്ക് ചേക്കേറിയെങ്കിലും, ബിരുദ പഠനത്തിന് ശേഷം നാല് വർഷത്തോളം ഇന്ത്യയിൽ തിരിച്ചെത്തി ചെന്നൈ കലാക്ഷേത്രയിൽ നിന്ന് ഭരതനാട്യം അഭ്യസിച്ചിരുന്നു.

ഹോളിവുഡ് തിരക്കഥാകൃത്തും നിർമാതാവുമായ വാലി ചന്ദ്രശേഖരനാണ് നിത്യയുടെ ഭർത്താവ്. 2010-ൽ ബെംഗളൂരുവിൽ വെച്ചായിരുന്നു ഇവരുടെ വിവാഹം. നഗരസഭാ കൗൺസിലർ എന്ന നിലയിൽ മികച്ച ജനകീയ പ്രവർത്തനം കാഴ്ചവെച്ച നിത്യ രാമന്റെ വിജയം അമേരിക്കൻ മലയാളി സമൂഹത്തിനും വലിയ അഭിമാന നിമിഷമായി മാറി.