മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹി ജന്തർ മന്തറിൽ സംഘടിപ്പിച്ച പ്രതിഷേധത്തിൽ പങ്കെടുക്കാനെത്തിയ കോക്ക്റോച്ച് ജനതാ പാർട്ടി (CJP) സ്ഥാപകൻ അഭിജീത് ദീപ്കേയെ ദില്ലി പോലീസ് കസ്റ്റഡിയിലെടുത്തു. വിമാനത്താവളത്തിൽ എത്തിച്ചേർന്ന വിമാനത്തിൽ നിന്ന് പുറത്തിറങ്ങാൻ പോലും അനുവദിക്കാതെയാണ് അദ്ദേഹത്തെ പോലീസ് പിടികൂടിയത്.
അഭിജീത് ദീപ്കേയോടൊപ്പം വിമാനത്തിലുണ്ടായിരുന്ന സി.ജെ.പി വക്താവ് സൗരവ് ദാസ്, ആഷുതോഷ് റാങ്ക എന്നിവരെയും പോലീസ് കസ്റ്റഡിയിലെടുത്തിട്ടുണ്ട്. വിമാനത്തിൽ എത്തിയ ഉടൻ തന്നെ തങ്ങളെ തടഞ്ഞുവെക്കുകയായിരുന്നുവെന്നും വിമാനത്തിന് പുറത്തേക്ക് ഇറങ്ങാൻ പോലും സാധിച്ചില്ലെന്നും അഭിജീത് ദീപ്കേ പ്രതികരിച്ചു.
തിരഞ്ഞെടുപ്പ് കമ്മീഷനെതിരായ സി.ജെ.പിയുടെ വമ്പൻ സമരത്തിന് മുന്നോടിയായിട്ടാണ് ഡൽഹി പോലീസിന്റെ ഈ നിർണ്ണായക നടപടി. ക്രമസമാധാന പ്രശ്നങ്ങൾ ചൂണ്ടിക്കാട്ടി പ്രതിഷേധങ്ങൾക്ക് മുൻകൂട്ടി അനുമതി നിഷേധിച്ചിരുന്ന പോലീസ്, നേതാക്കൾ തലസ്ഥാനത്തേക്ക് എത്തുന്നതിന് തൊട്ടുമുമ്പ് തന്നെ അറസ്റ്റ് രേഖപ്പെടുത്തി സമരം അടിച്ചമർത്താനാണ് ശ്രമിക്കുന്നത്.
