'ഡിവോഴ്സ് ആയാൽ വളർത്തുമൃഗങ്ങളെ ആര് നോക്കും?'; ചൈനയിൽ വൻ വിഭജന ചർച്ചയ്ക്ക് തിരികൊളുത്തി പുതിയ വിഷയം

വളർത്തുമൃഗങ്ങൾ കുടുംബത്തിലെ അവിഭാജ്യ ഘടകങ്ങളായി മാറുന്ന സാഹചര്യത്തിൽ, ദമ്പതികൾ വേർപിരിയുമ്പോൾ അവയുടെ സംരക്ഷണച്ചുമതല ആർക്കായിരിക്കണമെന്ന വിഷയത്തിൽ ചൈനയിൽ വലിയ രീതിയിലുള്ള ചർച്ചകൾ നടക്കുകയാണ്. വേർപിരിയുന്ന അവസരത്തിൽ വളർത്തുമൃഗങ്ങളുടെ സംരക്ഷണം സംബന്ധിച്ച് മുൻകൂട്ടിത്തന്നെ ധാരണയിലെത്തണമെന്ന് സോഷ്യൽ മീഡിയയിൽ പലരും അഭിപ്രായപ്പെടുന്നു. വളർത്തുമൃഗങ്ങൾ വെറുമൊരു വസ്തുവല്ലെന്നും, ഓർമകളും വികാരങ്ങളുമുള്ള ജീവികളായതുകൊണ്ട് അവയ്ക്ക് വിഷമമുണ്ടാകാതിരിക്കാൻ സംരക്ഷണച്ചുമതലയിൽ ദമ്പതികൾ നേരത്തെ തന്നെ വ്യക്തത വരുത്തണമെന്നുമാണ് സോഷ്യൽ മീഡിയയിൽ ഉയരുന്ന പ്രധാന നിർദേശം.

ചൈനയിൽ വളർത്തുമൃഗങ്ങളുടെ പരിചരണത്തിനും ക്ഷേമത്തിനുമായി ഉടമകൾ വലിയ തുക ചെലവഴിക്കുന്ന രീതി വർധിച്ചു വരികയാണ്. ഷാങ്ഹായിലെ പെറ്റ് കിന്റർഗാർട്ടനുകൾ ഇതിനൊരു മികച്ച ഉദാഹരണമാണ്. വളർത്തുമൃഗങ്ങളുടെ ശാരീരികക്ഷമത മെച്ചപ്പെടുത്തുന്നതിനും പകൽസമയത്ത് മറ്റ് മൃഗങ്ങളുമായി ഇടപഴകുന്നതിനുമായി ഒരുക്കുന്ന ഇത്തരം കേന്ദ്രങ്ങളിൽ 98 മുതൽ 138 യുവാൻ വരെയാണ് ഒരു ദിവസത്തെ ഫീസ്. ഇതിനുപുറമേ, അക്യുപങ്ചർ, തുയ് നാ മസാജ് തുടങ്ങിയ പരമ്പരാഗത ചൈനീസ് ചികിത്സാരീതികളും ഇവയുടെ മരണശേഷമുള്ള സംസ്കാരച്ചടങ്ങുകൾക്കും സ്മരണാചടങ്ങുകൾക്കുമുള്ള സേവനങ്ങളും ചൈനയിൽ വൻതോതിൽ പ്രചാരം നേടുന്നുണ്ട്.

അതേസമയം, വളർത്തുമൃഗങ്ങളുമായി ബന്ധപ്പെട്ട സാമൂഹിക കാഴ്ചപ്പാടുകളും ജീവിതരീതികളും വേഗത്തിൽ മാറുമ്പോഴും ഇവയുമായി ബന്ധപ്പെട്ട നിയമസംവിധാനങ്ങൾ ആവശ്യത്തിന് വികസിച്ചിട്ടില്ലെന്ന ആശങ്കയും നിലനിൽക്കുന്നുണ്ട്. എന്നാൽ ചില സന്ദർഭങ്ങളിൽ വേർപിരിഞ്ഞ ശേഷവും വളർത്തുമൃഗങ്ങളുടെ സംരക്ഷണം പരസ്പരം പങ്കിടുന്നവരുമുണ്ട്. ചൈനയിൽ വളർത്തുമൃഗങ്ങളെ സ്വന്തം കുടുംബാംഗങ്ങളായി കാണുന്നവരുടെ എണ്ണം വർധിക്കുന്നതിനൊപ്പം അവയുടെ അവകാശങ്ങളും ക്ഷേമവും വലിയ സാമൂഹിക വിഷയമായി മാറുകയാണെന്ന് ഈ ചർച്ചകൾ വ്യക്തമാക്കുന്നു.