എഐ ഏജന്റുകൾ പരിധിവിട്ട് പ്രവർത്തിക്കുന്നതായുള്ള റിപ്പോർട്ടുകൾക്ക് പിന്നാലെ, ഏറ്റവും പുതിയ ആർട്ടിഫിഷ്യൽ ഇന്റലിജൻസ് മോഡലുകളുടെ പരിശീലനം നിർത്തിവെച്ചതായി ഓപ്പൺ എഐ അറിയിച്ചു. യുഎസ് സർക്കാരിന്റെ വെബ്‌സൈറ്റുകളിൽ നിന്ന് ഓപ്പൺ എഐയുടെ ബോട്ടുകൾ അനധികൃതമായി വിവരം ചോർത്തിയെന്നതടക്കം ഗുരുതരമായ റിപ്പോർട്ടുകൾ പുറത്തുവന്നിരുന്നു. സർക്കാർ വെബ്‌സൈറ്റുകളിൽ നിന്ന് വിവരങ്ങൾ ശേഖരിക്കുന്നതിനിടയിൽ ആവശ്യപ്പെടാത്ത മറ്റു വിവരങ്ങൾ കൂടി എഐ ഏജന്റുകൾ നൽകിയെന്ന സംഭവം കമ്പനി പരിശോധിച്ചുവരികയാണ്. ഇതിന് പിന്നാലെയാണ് മോഡലുകളുടെ പ്രവർത്തനം താൽക്കാലികമായി നിർത്തിവെച്ചതായി അധികൃതർ വ്യക്തമാക്കിയത്.
ഇതിനിടെ, ഓപ്പൺ എഐയുടെ ഏജന്റുകൾ വിദ്യാഭ്യാസ വകുപ്പിന്റെ വെബ്‌സൈറ്റ് ഹാക്ക് ചെയ്യാൻ ശ്രമിച്ചതായി എഐ മൂല്യനിർണ്ണയ സ്ഥാപനമായ ട്രാൻസ്ലസ് വെളിപ്പെടുത്തിയിരുന്നു. എന്നാൽ ഈ ആരോപണം ഓപ്പൺ എഐ ഇതുവരെ സ്ഥിരീകരിച്ചിട്ടില്ല. കൂടുതൽ സുരക്ഷാ സംവിധാനങ്ങൾ ഏർപ്പെടുത്തിയെന്ന് ഉറപ്പുവരുത്തിയ ശേഷമേ പരിശീലനം പുനരാരംഭിക്കൂ എന്ന് കമ്പനി പ്രസ്താവനയിൽ വ്യക്തമാക്കിയിട്ടുണ്ട്. എഐ വികസിക്കുമ്പോഴും പുതിയ പ്രശ്നങ്ങൾ ഉയർന്നുവരുമ്പോഴും ഭാവിയിലും ഇത്തരം പ്രവർത്തനങ്ങൾ താൽക്കാലികമായി നിർത്തിവെക്കേണ്ടി വന്നേക്കാമെന്നും കമ്പനി കൂട്ടിച്ചേർത്തു.
ഏജന്റുകൾ സ്വയം തീരുമാനങ്ങൾ എടുക്കുന്നതും വെബ്സൈറ്റുകൾ ഹാക്ക് ചെയ്യുന്നതും രഹസ്യവിവരങ്ങൾ പുറത്തുവിടുന്നതും തടയാൻ കർശനമായ സുരക്ഷാ ക്രമീകരണങ്ങൾ ആവശ്യമാണ്. ഇതിനായി എഐ വികസനത്തിന്റെ വേഗത കുറയ്ക്കണമെന്ന് നിയമനിർമ്മാതാക്കളിൽ നിന്നും സാങ്കേതിക വിദഗ്ധരിൽ നിന്നും എഐ ലാബുകൾക്ക് മേൽ ശക്തമായ സമ്മർദ്ദമുണ്ട്. ഇതിനു മുന്നേ തന്നെ ഓപ്പൺ എഐയുടെയും ആന്ത്രോപിക്കിന്റെയും തലവൻമാരും എഐയുടെ വളർച്ചയിലെ വേഗത കുറയ്ക്കണമെന്ന് ആവശ്യപ്പെട്ടിരുന്നു. വിവിധ കാരണങ്ങളാൽ കഴിഞ്ഞ മൂന്ന് മാസത്തിനിടെ ഇത് രണ്ടാം തവണയാണ് ഓപ്പൺ എഐ തങ്ങളുടെ മോഡലുകളുടെ വികസനം നിർത്തിവെക്കുന്നത്.
