ഇന്ത്യ മുന്നണിയുടെ സമാധാനപരമായ പ്രതിഷേധത്തിനിടെ ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി വദ്ര എന്നിവരുൾപ്പെടെയുള്ള നേതാക്കളെയും ജനപ്രതിനിധികളെയും ഡൽഹി പോലീസ് തടഞ്ഞുവെച്ച് കസ്റ്റഡിയിലെടുത്ത നടപടിയിൽ പ്രതിഷേധിച്ച് കെ. സുധാകരൻ എം.പി രാഷ്ട്രപതി ദ്രൗപദി മുർമുവിന് കത്തയച്ചു. ഒക്ടോബർ 7-ന് തിരഞ്ഞെടുപ്പ് കമ്മീഷന്റെ പ്രവർത്തനരീതിയിൽ പ്രതിഷേധിച്ച് ജന്തർ മന്തറിലേക്ക് നീങ്ങിയ എം.പിമാരെ തടഞ്ഞ നടപടിയെ രൂക്ഷമായി വിമർശിച്ച അദ്ദേഹം, സമാധാനപരമായ ജനാധിപത്യ പ്രതിഷേധങ്ങളെ ക്രമസമാധാന പ്രശ്നമായി ചിത്രീകരിച്ച് അടിച്ചമർത്താൻ അനുവദിക്കരുതെന്ന് ആവശ്യപ്പെട്ടു.
പ്രതിഷേധക്കാരെ തടഞ്ഞതിന്റെ നിയമപരമായ അടിസ്ഥാനം, പോലീസ് നിയന്ത്രണങ്ങളുടെ ആനുപാതികത, സിറ്റിംഗ് എം.പിമാരോടുള്ള ബലപ്രയോഗം ഭരണഘടനാപരമായ പദവിക്ക് ചേർന്നതാണോ എന്നീ വിഷയങ്ങളിൽ വിശദമായ റിപ്പോർട്ട് തേടണമെന്ന് രാഷ്ട്രപതിയോട് അദ്ദേഹം അഭ്യർത്ഥിച്ചു. കൂടാതെ, ചീഫ് ഇലക്ഷൻ കമ്മീഷണർ ജ്ഞാനേഷ് കുമാറുമായി ബന്ധപ്പെട്ട് മുൻപ് നൽകിയ പരാതിയിന്മേൽ എടുത്ത നടപടിയുടെ വിവരങ്ങൾ ലഭ്യമാക്കണമെന്നും സ്വതന്ത്രമായ അന്വേഷണം ഉറപ്പാക്കണമെന്നും അദ്ദേഹം ആവശ്യപ്പെട്ടു. ചോദ്യം ചെയ്യാനും വിയോജിക്കാനുമുള്ള അവകാശം സംരക്ഷിച്ചാൽ മാത്രമേ ജനാധിപത്യം നിലനിൽക്കൂ എന്നും സുധാകരൻ കൂട്ടിച്ചേർത്തു.
