കേന്ദ്ര സർക്കാരിന്റെ ജനദ്രോഹ നയങ്ങൾക്കും വോട്ടവകാശം കവർന്നെടുക്കാനുള്ള നീക്കങ്ങൾക്കുമെതിരെ ശക്തമായ പ്രതിഷേധവുമായി 'ഇന്ത്യ' സഖ്യം മുന്നോട്ട് പോവുകയാണെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ വ്യക്തമാക്കി. ഇതിന്റെ ഭാഗമായി സഖ്യത്തിലെ മുഴുവൻ എം.പിമാരും ഗാന്ധി സ്മാരകത്തിലേക്ക് മാർച്ച് നടത്തുമെന്നും അവിടെ സമാധാനപരമായി ധർണ സംഘടിപ്പിക്കുമെന്നും അദ്ദേഹം അറിയിച്ചു. പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കും രാജ്യതാൽപര്യം മുൻനിർത്തി പ്രവർത്തിക്കാനുള്ള വിവേകവും ബുദ്ധിയും നൽകേണമേ എന്ന് സമാധാനപരമായി പ്രാർത്ഥിക്കുകയാണ് ഈ പ്രതിഷേധത്തിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു.
ബി.ജെ.പി സർക്കാർ രാജ്യത്തെ ജനങ്ങളുടെ അടിസ്ഥാന വോട്ടവകാശത്തിന്മേൽ നടത്തുന്ന കടന്നുകയറ്റം ജനങ്ങൾക്ക് മുന്നിൽ തുറന്നുകാട്ടുകയാണ് ഈ പ്രതിഷേധത്തിലൂടെ ഉദ്ദേശിക്കുന്നത്. മഹാത്മാഗാന്ധി, ജവഹർലാൽ നെഹ്റു, സർദാർ വല്ലഭ്ഭായി പട്ടേൽ തുടങ്ങിയ മഹാനായ നേതാക്കൾ രക്തം നീരാക്കി പോരാടി നേടിയെടുത്ത സ്വാതന്ത്ര്യവും ഭരണഘടനാവകാശങ്ങളുമാണ് മോദിയും അമിത് ഷായും ചേര്‍ന്ന് ഇല്ലാതാക്കാൻ ശ്രമിക്കുന്നതെന്ന് രാജ്യത്തോട് ഉറക്കെ വിളിച്ചുപറയുമെന്നും മല്ലികാർജുൻ ഖാർഗെ പറഞ്ഞു.
