പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ, ആർ.എസ്.എസ് തലവൻ മോഹൻ ഭഗവത് എന്നിവർ ചേർന്ന് രാജ്യത്ത് ക്രിമിനൽ ഗൂഢാലോചന നടത്തുകയാണെന്ന് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി ആരോപിച്ചു. ഇവർ ചെയ്ത കുറ്റങ്ങൾക്ക് ഭാവിയിൽ നിയമത്തിന് മുന്നിൽ വിചാരണ നേരിടേണ്ടി വരുമെന്ന് അദ്ദേഹം മുന്നറിയിപ്പ് നൽകി. മുന്നൂറോളം വരുന്ന എം.പിമാർ സമാധാനപരമായി പ്രതിഷേധിക്കാൻ ശ്രമിക്കുമ്പോൾ കഴിഞ്ഞ രണ്ടു ദിവസമായി കേന്ദ്ര സർക്കാർ അതിന് അനുമതി നൽകുന്നില്ലെന്ന് അദ്ദേഹം കുറ്റപ്പെടുത്തി. ആദ്യദിവസം തിരഞ്ഞെടുപ്പ് കമ്മീഷൻ ഓഫീസിന് മുന്നിലും അടുത്ത ദിവസം ജന്തർ മന്ദിറിന് സമീപവും പ്രതിഷേധക്കാരെ തടയുകയും തങ്ങളുടെ ആളുകളെ മർദ്ദിക്കുകയും ചെയ്തതായി രാഹുൽ ഗാന്ധി പറഞ്ഞു.
ഭരണഘടനയെ തകർക്കുകയും 'വോട്ട് ചോരി' (വോട്ട് മോഷണം) നടത്തുകയും ചെയ്തുകൊണ്ട് മോദിയും അമിത് ഷായും ഗ്യാനേഷ് കുമാറും മോഹൻ ഭഗവതും ചേർന്ന് ഇന്ത്യയെ തടവറയിലാക്കിയിരിക്കുകയാണെന്ന് അദ്ദേഹം ആരോപിച്ചു. രാജ്യത്തെ ജനാധിപത്യം അട്ടിമറിച്ച ഇവർക്കെതിരെ കർശന നടപടി സ്വീകരിക്കുമെന്നും ഇവരെ നിയമത്തിന് മുന്നിൽ കൊണ്ടുവരുമെന്നത് തങ്ങളുടെ ഉറപ്പാണെന്നും രാഹുൽ ഗാന്ധി വ്യക്തമാക്കി.
പ്രതിഷേധ പരിപാടികൾക്ക് മുന്നോടിയായി കോൺഗ്രസ് അധ്യക്ഷൻ മല്ലികാർജുൻ ഖാർഗെ വി വിളിച്ചുചേർത്ത ഉച്ചകോടി യോഗത്തിൽ 'ഇന്ത്യ' സഖ്യത്തിലെ പ്രമുഖ നേതാക്കൾ പങ്കെടുത്തു. രാഹുൽ ഗാന്ധി, പ്രിയങ്ക ഗാന്ധി വദ്ര എന്നിവർക്ക് പുറമെ ആർ.ജെ.ഡി എം.പി മനോജ് ഝാ, തൃണമൂൽ കോൺഗ്രസ് എം.പി അഭിഷേക് ബാനർജി, സി.പി.ഐ (എം) എം.പി ജോൺ ബ്രിട്ടാസ് എന്നിവരടങ്ങുന്ന മുതിർന്ന നേതാക്കൾ യോഗത്തിൽ പങ്കെടുക്കുകയും തുടർന്ന് പ്രതിഷേധത്തിലേക്ക് നീങ്ങുകയും ചെയ്തു.
