ഇന്ത്യയും വെസ്റ്റ് ഇന്‍ഡീസും തമ്മിലുള്ള ടി20 പരമ്പരയിലെ അഞ്ചാമത്തെയും അവസാനത്തെയും പോരാട്ടം മഴ മൂലം ഉപേക്ഷിച്ചതോടെ ഇരു ടീമുകളെയും സംയുക്ത ജേതാക്കളായി പ്രഖ്യാപിച്ചു. ബംഗളൂരുവിൽ നടന്ന മത്സരത്തിൽ തുടക്കം മുതലേ മഴ വില്ലനായതിനെ തുടർന്ന് ഏറെ വൈകി 9 ഓവറാക്കി ചുരുക്കിയാണ് കളി ആരംഭിച്ചത്. ടോസ് നേടിയ വെസ്റ്റ് ഇൻഡീസ് ഇന്ത്യയെ ബാറ്റിംഗിന് അയക്കുകയായിരുന്നു.
കിരീടം പങ്കിടേണ്ടി വന്നുവെങ്കിലും വെസ്റ്റ് ഇൻഡീസിനെ സംബന്ധിച്ചിടത്തോളം ഇത് ചരിത്രപരമായ നേട്ടമാണ്. 2002-ന് ശേഷം ഇന്ത്യൻ മണ്ണിൽ അവർ സ്വന്തമാക്കുന്ന ആദ്യ പരമ്പര നേട്ടം കൂടിയാണിത്. ആദ്യ ഇന്നിംഗ്സിൽ ഇന്ത്യ 7.4 ഓവറിൽ 5 വിക്കറ്റ് നഷ്ടത്തിൽ 118 റൺസ് നേടി നിൽക്കവെയാണ് വീണ്ടും ശക്തമായ മഴ പെയ്തത്. തുടർന്ന് കളി തുടരാൻ സാധിക്കാതെ വന്നതോടെ മത്സരം ഉപേക്ഷിക്കുകയായിരുന്നു.
അതിവേഗ ബാറ്റിംഗ് പുറത്തെടുത്ത ഇന്ത്യക്കായി ഇഷാൻ കിഷൻ 10 പന്തിൽ 30 റൺസും (2 സിക്സ്, 3 ഫോർ), വെറും 6 പന്തിൽ 24 റൺസുമായി (3 സിക്സ്, 1 ഫോർ) നമാൻ ദിറും തിളങ്ങി. മലയാളി താരം സഞ്ജു സാംസൺ 7 പന്തിൽ 16 റൺസും ക്യാപ്റ്റൻ ശ്രേയസ് അയ്യർ 14 പന്തിൽ 22 റൺസുമെടുത്ത് പുറത്തായി. അഭിഷേക് ശർമ (6), തിലക് വർമ (7) എന്നിവരാണ് പുറത്തായ മറ്റ് ബാറ്റർമാർ.
വെസ്റ്റ് ഇൻഡീസിനായി മികച്ച ബൗളിംഗ് പ്രകടനം പുറത്തെടുത്ത കീമോ പോൾ, ഷമർ സ്പ്രിംഗർ എന്നിവർ രണ്ട് വിക്കറ്റുകൾ വീതം വീഴ്ത്തിയപ്പോൾ ഷമർ ജോസഫ് ഒരു വിക്കറ്റും സ്വന്തമാക്കി.
ബംഗളൂരുവിൽ മഴക്കളി; ടി20 ട്രോഫി പങ്കുവെച്ച് ഇന്ത്യയും വെസ്റ്റ് ഇൻഡീസും
Jaihind TV News Report
Jaihind TV Web Desk
2 min read
18 reads
