വടകര: കോഴിക്കോട് വിലങ്ങാട് വനമേഖലകളില്‍ മഴ കനത്തതോടെ നദികളില്‍ ജലനിരപ്പ് ക്രമാതീതമായി ഉയരുന്നു. പാനോം വനമേഖലയില്‍ ഉരുള്‍പൊട്ടിയതായി നാട്ടുകാര്‍ സംശയം പ്രകടിപ്പിച്ചിട്ടുണ്ട്.
കനത്ത മഴയില്‍ വിലങ്ങാട് ടൗണ്‍ പാലത്തിനും വായാട് പാലത്തിനും മുകളിലൂടെ വെള്ളം കയറി. മുമ്പ് മേഖലയിലുണ്ടായ ഉരുള്‍പൊട്ടലില്‍ ഭാഗികമായി തകര്‍ന്ന പാലങ്ങളാണ് ഇവ രണ്ടും. നിലവില്‍ ഈ പ്രദേശങ്ങളില്‍ മഴ തുടരുകയാണ്.
മഴ കനക്കുന്ന സാഹചര്യത്തില്‍ വില്ലേജ് ഓഫീസര്‍മാര്‍ക്ക് വടകര തഹസില്‍ദാര്‍ ജാഗ്രതാ നിര്‍ദ്ദേശം നല്‍കിയിട്ടുണ്ട്. ദുരന്തനിവാരണ പ്രവര്‍ത്തനങ്ങള്‍ ഏകോപിപ്പിക്കുന്നതിനായി ഉദ്യോഗസ്ഥരോട് മേഖലയില്‍ തന്നെ ക്യാമ്പ് ചെയ്യാന്‍ നിര്‍ദ്ദേശം നല്‍കി. മുന്‍പ് ഉരുള്‍പൊട്ടലുണ്ടായ പ്രദേശങ്ങളില്‍ നിന്ന് ആവശ്യമെങ്കില്‍ കുടുംബങ്ങളെ അടിയന്തരമായി മാറ്റിപ്പാര്‍പ്പിക്കുമെന്നും തഹസില്‍ദാര്‍ അറിയിച്ചു.
വിലങ്ങാട് വനമേഖലയില്‍ മഴ ശക്തം: പുഴകളില്‍ ജലനിരപ്പുയര്‍ന്നു; ജാഗ്രത
Jaihind TV News Report
Jaihind TV Web Desk
Updated Oct 12, 2026
1 min read
302 reads
