'രാമന്റെ പേര് പറഞ്ഞ് പാവങ്ങളുടെ കൂലി കവരുന്നു'; തൊഴിലുറപ്പ് പദ്ധതിയുടെ മാറ്റം ഗ്രാമീണ ഇന്ത്യയോടുള്ള കടുത്ത വഞ്ചനയെന്ന് കോണ്‍ഗ്രസ്

മഹാരാഷ്ട്ര കടുത്ത വരള്‍ച്ചയെ അഭിമുഖീകരിക്കുന്ന സാഹചര്യത്തില്‍, ദേശീയ ഗ്രാമീണ തൊഴിലുറപ്പ് പദ്ധതിക്ക് പകരമായി പുതിയ പദ്ധതി കൊണ്ടുവന്നത് ഗ്രാമീണ ഇന്ത്യയുടെ സാമൂഹിക സുരക്ഷാ വലയത്തിന് മേലുള്ള 'സര്‍ജിക്കല്‍ സ്ട്രൈക്ക്' ആണെന്ന് കോണ്‍ഗ്രസ് ആരോപിച്ചു. മഹാരാഷ്ട്രയിലെ ബീഡ് ജില്ലയില്‍ ഒഫിഷ്യല്‍ രേഖകളില്‍ ആയിരക്കണക്കിന് തൊഴിലാളികള്‍ ജോലin ചെയ്യുന്നതായി കാണിച്ചിട്ടുണ്ടെങ്കിലും, അഞ്ച് സ്ഥലങ്ങളില്‍ നടത്തിയ അന്വേഷണത്തില്‍ ഒരാളെപ്പോലും ജോലിക്കായി കണ്ടെത്താനായില്ലെന്ന മാധ്യമ വാര്‍ത്തകള്‍ ചൂണ്ടിക്കാണിച്ചാണ് കോണ്‍ഗ്രസ് ജനറല്‍ സെക്രട്ടറി ജയ്റാം രമേശ് രംഗത്തെത്തിയത്.

കഴിഞ്ഞ ഒരു നാളിനിടയിലെ ഏറ്റവും വലിയ വരള്‍ച്ചയാണ് ബീഡും മറ്റ് മഹാരാഷ്ട്ര ജില്ലകളും നേരിടുന്നതെന്നും, അത്തരം പ്രതിസന്ധി ഘട്ടങ്ങളില്‍ ഗ്രാമീണ കുടുംബങ്ങള്‍ക്ക് ഉറപ്പായ തൊഴില്‍ നല്‍കിയിരുന്നത് തൊഴിലുറപ്പ് പദ്ധതിയായിരുന്നുവെന്നും ജയ്റാം രമേശ് എക്സ് പ്ലാറ്റ്‌ഫോമില്‍ കുറിച്ചു. ഔദ്യോഗിക രേഖകളിൽ തൊഴിലാളികൾ ജോലി ചെയ്യുന്നതായി കാണിക്കുമ്പോഴും, മാസങ്ങളായി പലര്‍ക്കും യാതൊരു ജോലിയും ലഭിച്ചിട്ടില്ലെന്നാണ് അന്വേഷണത്തില്‍ വ്യക്തമായത്. ഭരണകക്ഷിയില്‍പ്പെട്ട പ്രാദേശിക രാഷ്ട്രീയ നേതാക്കളാണ് തൊഴിലാളികളുടെ പേരില്‍ രേഖപ്പെടുത്തിയ കൂലി തട്ടിയെടുക്കുന്നതെന്നും അദ്ദേഹം ആരോപിച്ചു.

ഉത്തര്‍പ്രദേശ് ഉള്‍പ്പെടെയുള്ള ബിജെപി ഭരിക്കുന്ന മറ്റ് സംസ്ഥാനങ്ങളിലും വ്യാജ ഹാജറും ക്ലോണ്‍-ആപ്പ് അഴിമതികളും നടക്കുന്നുണ്ടെന്ന് ചൂണ്ടിക്കാണിച്ച ജയ്റാം രമേശ്, ഇത് വെറുമൊരു അഴിമതി മാത്രമല്ലെന്നും തൊഴിലാളികളുടെ കൂലി വ്യവസ്ഥാപിതമായി കവര്‍ന്നെടുക്കലാണെന്നും വ്യക്തമാക്കി. കോണ്‍ഗ്രസിന്റെ 'വോട്ട് ചോരി' എന്ന സ്ലോഗന് സമാനമായി, 'ഗ്രാമീണ മസ്ദൂരി ചോരി' അഥവാ ഗ്രാമീണ തൊഴിലാളികളുടെ കൂലി കവര്‍ച്ചയാണ് സര്‍ക്കാര്‍ നടപ്പിലാക്കുന്നതെന്നും അദ്ദേഹം കുറ്റപ്പെടുത്തി.

രണ്ട് പതിറ്റാണ്ടുകള്‍ക്ക് മുമ്പ് യുപിഎ സര്‍ക്കാര്‍ കൊണ്ടുവന്ന തൊഴിലുറപ്പ് പദ്ധതിക്ക് പകരമായി 'വിക്ഷിത് ഭാരത് ഗ്യാരണ്ടി ഫോർ റോസ്ഗർ ആന്റ് ആജീവിക മിഷൻ (ഗ്രാമീൺ) ആക്ട്' (VB-G RAM G) രാജ്യവ്യാപകമായി നടപ്പിലാക്കിക്കഴിഞ്ഞു. പുതിയ നിയമം സാങ്കേതികവിദ്യയുടെ സഹായത്തോടെയുള്ള ഒഴിവാക്കലുകള്‍ക്ക് ആക്കം കൂട്ടുമെന്നും, തീരുമാനമെടുക്കല്‍ പ്രക്രിയ കേന്ദ്രീകരിക്കുമെന്നും, ഗ്രാമപഞ്ചായത്തുകളുടെ അധികാരം ദുര്‍ബലപ്പെടുത്തുമെന്നും കോണ്‍ഗ്രസ് നേരത്തെയും വിമര്‍ശനം ഉന്നയിച്ചിരുന്നു. രാമന്റെ നാമം ഉപയോഗിച്ച് പാവപ്പെട്ട ഗ്രാമീണരുടെ അവകാശങ്ങള്‍ ഹനിക്കുകയാണ് ബിജെപിയെന്നും കോണ്‍ഗ്രസ് ആരോപിക്കുന്നു.