വിറപ്പിച്ച് കേപ് വെര്‍ദെ; എക്‌സ്ട്രാ ടൈം ത്രില്ലറില്‍ അര്‍ജന്റീനയ്ക്ക് ജയം; പ്രീക്വാര്‍ട്ടറില്‍; മെസിക്ക് റെക്കോര്‍ഡ്

മിയാമി: ലോകകപ്പ് അരങ്ങേറ്റക്കാരായ കേപ് വെര്‍ദെയുടെ അവിസ്മരണീയമായ പോരാട്ടവീര്യത്തെ എക്‌സ്ട്രാ ടൈം വരെ നീണ്ട ആവേശപ്പോരില്‍ മറികടന്ന് നിലവിലെ ചാമ്പ്യന്മാരായ അര്‍ജന്റീന പ്രീ-ക്വാര്‍ട്ടറിലേക്ക് യോഗ്യത നേടി (3-2). സൗത്ത് ഫ്‌ലോറിഡയിലെ അര്‍ജന്റീനന്‍ ആരാധകരെ അക്ഷരാര്‍ത്ഥത്തില്‍ ഞെട്ടിച്ച പ്രകടനമാണ് ആഫ്രിക്കന്‍ വന്‍കരയിലെ ഈ ചെറിയ ദ്വീപ് രാജ്യം പുറത്തെടുത്തത്. നിശ്ചിത സമയത്തും എക്‌സ്ട്രാ ടൈമിന്റെ ആദ്യ പകുതിയിലും സമനില പാലിച്ച മത്സരത്തില്‍, 111-ാം മിനിറ്റില്‍ പിറന്ന ഒരു സെല്‍ഫ് ഗോളാണ് ഒടുവില്‍ അര്‍ജന്റീനയ്ക്ക് രക്ഷയായത്. 

മെസ്സിയുടെ കോര്‍ണര്‍ കിക്ക് പ്രതിരോധിക്കാന്‍ ശ്രമിക്കുന്നതിനിടെ കേപ് വെര്‍ദെയുടെ ഡിനെയ് ബോര്‍ഗസിന്റെ തലയില്‍ തട്ടി പന്ത് സ്വന്തം വലയിലേക്ക് കയറുകയായിരുന്നു.  മത്സരത്തിന്റെ 29-ാം മിനിറ്റില്‍ ലിയോണല്‍ മെസ്സിയിലൂടെ അര്‍ജന്റീനയാണ് ആദ്യം മുന്നിലെത്തിയത്. ലിസാന്‍ഡ്രോ മാര്‍ട്ടിനെസിന്റെ മികച്ചൊരു പാസ് സ്വീകരിച്ച് കേപ് വെര്‍ഡെ പ്രതിരോധത്തെ മറികടന്ന് മെസ്സി തൊടുത്ത ഷോട്ട് ഗോള്‍കീപ്പര്‍ വോസീന്യയെ കാഴ്ചക്കാരനാക്കി വലയില്‍ പതിക്കുകയായിരുന്നു. ഈ ഗോളോടെ ലോകകപ്പ് ചരിത്രത്തില്‍ 20 ഗോളുകള്‍ നേടുന്ന ആദ്യ താരം എന്ന ചരിത്ര റെക്കോര്‍ഡും മെസ്സി സ്വന്തമാക്കി. ഫ്രാന്‍സിന്റെ കിലിയന്‍ എംബാപ്പെയെക്കാള്‍ രണ്ട് ഗോളുകള്‍ മുന്നിലെത്തിയ മെസ്സി, ഈ ടൂര്‍ണമെന്റില്‍ തന്റെ ഏഴാം ഗോളോടെ ഗോള്‍ഡന്‍ ബൂട്ട് റേസിലും ഒന്നാമതെത്തി. തുടര്‍ച്ചയായ എട്ടാമത്തെ ലോകകപ്പ് മത്സരത്തിലാണ് മെസ്സി ഇപ്പോള്‍ ഗോള്‍ നേടുന്നത്.  

എന്നാല്‍ 59-ാം മിനിറ്റില്‍ ഡെറോയ് ഡുവാര്‍ട്ടെയിലൂടെ കേപ് വെര്‍ഡെ അര്‍ജന്റീനയെ ഞെട്ടിച്ചുകൊണ്ട് സമനില പിടിച്ചു. തുടര്‍ന്ന് മത്സരം എക്‌സ്ട്രാ ടൈമിലേക്ക് നീണ്ടു. 103-ാം മിനിറ്റില്‍ ലിസാന്‍ഡ്രോ മാര്‍ട്ടിനെസ് അര്‍ജന്റീനയ്ക്കായി വീണ്ടും ലീഡ് നേടിയെങ്കിലും (2-1), തൊട്ടടുത്ത നിമിഷങ്ങളില്‍ സിഡ്‌നി ലോപ്പസ് കബ്രാളിലൂടെ കേപ് വെര്‍ഡെ വീണ്ടും അര്‍ജന്റീനയെ സമനിലയില്‍ തളച്ചു (2-2). 40-കാരനായ ഗോള്‍കീപ്പര്‍ വോസീന്യയുടെ തകര്‍പ്പന്‍ പ്രകടനമാണ് കേപ് വെര്‍ദെയെ മത്സരത്തില്‍ നിലനിര്‍ത്തിയത്. മെസ്സിയുടെ അഞ്ച് ശ്രമങ്ങള്‍ ഉള്‍പ്പെടെ 10 മികച്ച സേവുകളാണ് താരം നടത്തിയത്. സ്‌പെയിന്‍, ഉറുഗ്വേ തുടങ്ങിയ വമ്പന്മാരെ ഗ്രൂപ്പ് ഘട്ടത്തില്‍ സമനിലയില്‍ തളച്ചാണ് കേപ് വെര്‍ദെ ഈ ടൂര്‍ണമെന്റിലെ ഏറ്റവും ചെറിയ രാജ്യമായി നോക്കൗട്ടില്‍ എത്തിയത്. ചൊവ്വാഴ്ച അറ്റ്‌ലാന്റയില്‍ നടക്കുന്ന പ്രീ-ക്വാര്‍ട്ടര്‍ മത്സരത്തില്‍ അര്‍ജന്റീന ഈജിപ്തിനെ നേരിടും.