കുട്ടികളുടെ സുരക്ഷയ്ക്ക് പുതിയ മാനങ്ങൾ; ലൈംഗികവിദ്യാഭ്യാസവും ഡിജിറ്റൽ സുരക്ഷയും പാഠ്യപദ്ധതിയുടെ ഭാഗമാക്കാൻ സുപ്രീംകോടതി

ലൈംഗികവിദ്യാഭ്യാസത്തിന്റെയും ഡിജിറ്റൽ സുരക്ഷാ പഠനത്തിന്റെയും ഭാഗമായി സ്വന്തം ശരീരത്തെക്കുറിച്ചും നല്ലതും മോശവുമായ സ്പർശനങ്ങളെക്കുറിച്ചും (Good touch and Bad touch) കുട്ടികളെ കൃത്യമായി പഠിപ്പിക്കണമെന്ന് സുപ്രീംകോടതി നിർദേശിച്ചു. കുട്ടികൾക്ക് എളുപ്പത്തിൽ നോട്ടമെത്തുന്ന രീതിയിൽ ക്ലാസ്‌മുറികൾ, ഹോസ്റ്റലുകൾ, ലൈബ്രറികൾ, കംപ്യൂട്ടർ ലാബുകൾ തുടങ്ങിയ സ്ഥലങ്ങളിലെല്ലാം ബാലസുരക്ഷാ ഹെൽപ് ലൈൻ നമ്പർ വ്യക്തമായി പ്രദർശിപ്പിക്കണമെന്നും കോടതി ഉത്തരവിട്ടു.

കുട്ടികൾ തങ്ങൾ നേരിടുന്ന ചൂഷണങ്ങളെക്കുറിച്ചോ ഓൺലൈൻ വഴി നേരിടുന്ന കുറ്റകൃത്യങ്ങളെക്കുറിച്ചോ തുറന്നുപറയുമ്പോൾ അതിനോട് ഉചിതമായും സഹതാപത്തോടെയും പ്രതികരിക്കാൻ അധ്യാപകർക്ക് ആവശ്യമായ പരിശീലനം നൽകണമെന്നും കോടതി വ്യക്തമാക്കി. ഇതിനായി കേന്ദ്ര-സംസ്ഥാന സർക്കാരുകൾ തുടർച്ചയായ ബോധവത്കരണ പരിപാടികൾ സംഘടിപ്പിക്കേണ്ടതുണ്ട്.

ചൂഷണത്തിന് ഇരയാകുന്ന കുട്ടികൾക്ക് ആവശ്യമായ സൗജന്യ കൗൺസലിങ്, മാനസിക പിന്തുണ, വൈദ്യസഹായം എന്നിവ ഉറപ്പാക്കണമെന്നും സുപ്രീംകോടതി നിർദേശിച്ചു. കുട്ടികൾക്കെതിരായ ലൈംഗികചൂഷണം തടയുന്നതിനുള്ള 2024-ലെ ഉത്തരവ് കൃത്യമായി പാലിക്കപ്പെടുന്നില്ല എന്ന് ചൂണ്ടിക്കാട്ടി സമർപ്പിച്ച ഹർജിയിലാണ് ജസ്റ്റിസ് ജെ.ബി. പർദിവാല അധ്യക്ഷനായ ബെഞ്ചിന്റെ ഈ സുപ്രധാന വിധി.

കൂടാതെ, സൈബർ ഇടങ്ങളിൽ പ്രചരിക്കുന്ന കുട്ടികളുടെ ലൈംഗികചൂഷണ ദൃശ്യങ്ങൾ കണ്ടെത്തി ഉടനടി നീക്കം ചെയ്യാൻ അടിയന്തര നടപടികൾ സ്വീകരിക്കണമെന്നും സുപ്രീംകോടതി മുൻദിവസത്തെ വിധിയിലൂടെ സർക്കാരുകളോട് ആവശ്യപ്പെട്ടിട്ടുണ്ട്.