കേരളത്തിലെ എസ്.ഐ.ആർ വോട്ടർപട്ടിക ചോർച്ച: പുറത്തായവർക്ക് ഇനിയും പരാതി നൽകാം, ഹർജികൾ നിലനിർത്തി സുപ്രീം കോടതി

ന്യൂഡൽഹി: കേരളത്തിൽ സമ്മറി ഇന്റൻസീവ് റിവിഷന് (SIR) ശേഷമുള്ള വോട്ടർ പട്ടികയിൽ നിന്ന് പേര് നീക്കം ചെയ്യപ്പെട്ടവർക്ക് പരാതി നൽകാൻ ഇനിയും അവസരമുണ്ടെന്ന് സുപ്രീം കോടതി വ്യക്തമാക്കി. എസ്.ഐ.ആർ എന്നത് ഒരു തുടർപ്രക്രിയയാണെന്ന് നിരീക്ഷിച്ച കോടതി, ലഭിക്കുന്ന പരാതികൾ പരിശോധിച്ച് കേന്ദ്ര തിരഞ്ഞെടുപ്പ് കമ്മിഷൻ ആവശ്യമായ തീരുമാനമെടുക്കണമെന്ന് നിർദേശിച്ചു. ചീഫ് ജസ്റ്റിസ് അധ്യക്ഷനായ ബെഞ്ചാണ് വിഷയത്തിൽ സുപ്രധാന നിലപാട് സ്വീകരിച്ചത്.

എസ്.ഐ.ആറിനെ തുടർന്ന് സംസ്ഥാനത്തെ വോട്ടർ പട്ടികയിൽ നിന്ന് പുറത്താക്കപ്പെട്ട 24 ലക്ഷത്തിലധികം ആളുകളിൽ പലർക്കും പരാതി നൽകാൻ സാധിച്ചിട്ടില്ലെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദന് വേണ്ടി ഹാജരായ അഡ്വ. ജി. പ്രകാശ് കോടതിയിൽ ചൂണ്ടിക്കാട്ടി. പരാതി നൽകാനുള്ള സമയം അവസാനിക്കുകയാണെന്നും അതിനാൽ സമയം നീട്ടിനൽകണമെന്നും അദ്ദേഹം ആവശ്യപ്പെട്ടു. ഈ ആവശ്യത്തെ സംസ്ഥാന സർക്കാരും സുപ്രീം കോടതിയിൽ ശക്തമായി പിന്തുണച്ചു.

പരാതിയുള്ളവർക്ക് ഇനിയും രേഖാമൂലം അപേക്ഷ സമർപ്പിക്കാമെന്ന് വ്യക്തമാക്കിയ കോടതി, പ്രശ്നങ്ങൾ പൂർണ്ണമായി പരിഹരിക്കുന്നത് വരെ കേരളത്തിൽ നിന്നുള്ള ഹർജികൾ തീർപ്പാക്കാതെ നിലനിർത്തുമെന്നും അറിയിച്ചു. അതേസമയം, തെരഞ്ഞെടുപ്പ് പ്രക്രിയ പൂർത്തിയായതിനാൽ കേരളത്തിൽ നിന്നുള്ള ഹർജികൾ അപ്രസക്തമായെന്നായിരുന്നു കേന്ദ്ര തെരഞ്ഞെടുപ്പ് കമ്മിഷന്റെ വാദം. കേസിൽ സംസ്ഥാന സർക്കാരിനുവേണ്ടി സ്റ്റാന്റിങ് കോൺസൽ പി.എസ്. സുൽഫിക്കർ അലി ഹാജരായി.