ശബരിമല തീർത്ഥാടനം ഡൽഹി ഉൾപ്പെടെയുള്ള നഗരങ്ങളിൽ നിന്ന് പ്രത്യേക ട്രെയിനുകൾ അനുവദിക്കും

ശബരിമല തീർത്ഥാടനത്തോടനുബന്ധിച്ച് കേരളത്തിലേക്ക് പ്രത്യേക ട്രെയിൻ സർവീസുകൾ അനുവദിക്കാൻ തീരുമാനമായി. കേന്ദ്ര റെയിൽവേ മന്ത്രിയുമായി നടത്തിയ കൂടിക്കാഴ്ചയിലാണ് ഇക്കാര്യത്തിൽ ഉറപ്പ് ലഭിച്ചതെന്ന് ജെബി മേത്തർ എം.പി അറിയിച്ചു. മകരവിളക്ക് സമയത്ത് ഡൽഹി, മുംബൈ, ചെന്നൈ, ബെംഗളൂരു, പൂനെ, ഹൈദരാബാദ് തുടങ്ങിയ പ്രധാന നഗരങ്ങളിൽ നിന്ന് കേരളത്തിലേക്ക് പുതിയ ട്രെയിൻ സർവീസുകൾ സർവീസ് നടത്തും. കൂടാതെ, തിരക്ക് കുറയ്ക്കുന്നതിനായി നിലവിലുള്ള ട്രെയിനുകളിൽ കൂടുതൽ എസി, സ്ലീപ്പർ കോച്ചുകൾ കൂട്ടിച്ചേർക്കുന്ന കാര്യവും റെയിൽവേ മന്ത്രാലയത്തിന്റെ പരിഗണനയിലാണ്.

തീർത്ഥാടന സർവീസുകൾക്ക് പുറമെ, പ്രധാനപ്പെട്ട രണ്ട് വന്ദേഭാരത് സ്ലീപ്പർ സർവീസുകളെക്കുറിച്ചും റെയിൽവേ മന്ത്രിക്ക് നൽകിയ നിവേദനത്തിൽ എം.പി ആവശ്യപ്പെട്ടിട്ടുണ്ട്. തിരുവനന്തപുരം - മംഗലാപുരം റൂട്ടിൽ പുതിയ വന്ദേഭാരത് സ്ലീപ്പർ ട്രെയിൻ ആരംഭിക്കണമെന്നതാണ് പ്രധാന ആവശ്യം. അതോടൊപ്പം, നിലവിൽ പ്രഖ്യാപിച്ചിട്ടുള്ള തിരുവനന്തപുരം - ബെംഗളൂരു വന്ദേഭാരത് സ്ലീപ്പർ സർവീസ് വരുന്ന ക്രിസ്മസ് കാലയളവിൽ തന്നെ ആരംഭിക്കണമെന്നും ജെബി മേത്തർ എം.പി റെയിൽവേ മന്ത്രിയോട് കത്തിലൂടെ അഭ്യർത്ഥിച്ചു.