നായകൾക്കായി ആഡംബര കാറുമായി പ്യൂഷോ; ഡോഗ് ബെഡ് മുതൽ പെറ്റ് ഡ്രയർ വരെ

വളർത്തു നായകളെ കുടുംബാംഗങ്ങളായി കാണുന്നവർക്കായി പുതിയ ആശയവുമായി എത്തിയിരിക്കുകയാണ് ഫ്രഞ്ച് വാഹന നിർമാതാക്കളായ പ്യൂഷോ. നായകൾക്കായി പ്രത്യേക സൗകര്യങ്ങൾ ഉൾപ്പെടുത്തി കമ്പനി അവതരിപ്പിച്ച ഇ-5008 ഡോഗ് എഡിഷൻ കോൺസെപ്റ്റ് വാഹനമാണ് ഇപ്പോൾ ശ്രദ്ധ നേടുന്നത്.

യാത്രകളിൽ നായകളെ ഒപ്പം കൊണ്ടുപോകുന്നവർക്ക് കൂടുതൽ സുരക്ഷിതവും സൗകര്യപ്രദവുമായ അനുഭവം നൽകുക എന്ന ലക്ഷ്യത്തോടെയാണ് ഈ വാഹനം രൂപകൽപന ചെയ്തിരിക്കുന്നത്. നായകളുടെ ആവശ്യങ്ങളും ശീലങ്ങളും മുൻനിർത്തിയാണ് വാഹനത്തിന്റെ ഓരോ ഭാഗവും ഡിസൈൻ ചെയ്തിരിക്കുന്നതെന്ന് പ്യൂഷോയുടെ മാതൃകമ്പനിയായ സ്റ്റെല്ലാന്റിസ് അറിയിച്ചു.

നായകളുടെ കാഴ്ചശേഷിക്ക് അനുയോജ്യമായ നിറങ്ങളാണ് വാഹനത്തിന്റെ ഇന്റീരിയറിൽ ഉപയോഗിച്ചിരിക്കുന്നത്. ശാന്തത നൽകുന്ന നീല നിറത്തിന്റെ വിവിധ ഷേഡുകളും ഉന്മേഷം പകരുന്ന മഞ്ഞ നിറത്തിന്റെ സാന്നിധ്യവും കാബിനിലുണ്ട്. ഇതിലൂടെ വളർത്തുമൃഗങ്ങൾക്ക് കൂടുതൽ സുഖകരമായ യാത്രാനുഭവം ഒരുക്കുന്നതിനൊപ്പം വാഹനത്തിന്റെ ഉൾഭാഗം വൃത്തിയായി സൂക്ഷിക്കാനും സഹായിക്കും.

യാത്രയ്ക്കിടെ നായകൾ വഴുതിവീഴാതിരിക്കാൻ മൃദുവും വഴുക്കാത്തതുമായ പ്രത്യേക മെറ്റീരിയലുകളാണ് ഇന്റീരിയറിൽ ഉപയോഗിച്ചിരിക്കുന്നത്. വാഹനം സഞ്ചരിക്കുമ്പോൾ വളർത്തുമൃഗങ്ങളുടെ സുരക്ഷ ഉറപ്പാക്കാൻ ഇത്തരം ചെറിയ കാര്യങ്ങൾ പോലും നിർണായകമാണെന്ന് കമ്പനി വ്യക്തമാക്കുന്നു.

 ഡോഗ് ബെഡായി മാറുന്ന പ്രത്യേക മാട്രസ്

ഈ കോൺസെപ്റ്റ് വാഹനത്തിലെ ഏറ്റവും ശ്രദ്ധേയമായ സവിശേഷതകളിലൊന്നാണ് മോഡുലാർ മാട്രസ്. ഇത് പിൻസീറ്റിലോ കാർഗോ ഭാഗത്തോ വിരിക്കാൻ കഴിയും. യാത്രയ്ക്കിടെ നായകളുടെ രോമം വാഹനത്തിനകത്ത് പടരാതിരിക്കാനും ഇത് സഹായിക്കും. യാത്ര കഴിഞ്ഞാൽ ഈ മാട്രസ് പുറത്തെടുത്ത് നായകൾക്ക് ഉറങ്ങാനുള്ള പ്രത്യേക ഡോഗ് ബെഡായും ഉപയോഗിക്കാം.

 പെറ്റ് ഡ്രയറും കളിപ്പാട്ടങ്ങളും ഉൾപ്പെടെ നിരവധി സൗകര്യങ്ങൾ

നായകൾക്കായി ഭക്ഷണ ബൗളുകൾ, ബാഗുകൾ, കണക്റ്റഡ് ഹാർനെസ്, കളിക്കാനുള്ള ഡോഗ് ടോയ് എന്നിവയും വാഹനത്തിൽ പ്രത്യേകം ഒരുക്കിയിട്ടുണ്ട്.

കൂടാതെ, വാഹനത്തിന്റെ വെഹിക്കിൾ-ടു-ലോഡ് (V2L) സാങ്കേതികവിദ്യ ഉപയോഗിച്ച് പ്രവർത്തിക്കുന്ന പെറ്റ് ഡ്രയറും ഈ വാഹനത്തിന്റെ പ്രത്യേകതയാണ്. മഴയിലോ വെള്ളത്തിലോ നനഞ്ഞ നായകളെ യാത്രയ്ക്കിടെ തന്നെ ഉണക്കാൻ ഇതിലൂടെ കഴിയും. ഉപയോഗം കഴിഞ്ഞാൽ ഡ്രയർ കാർഗോ ഫ്ലോറിന് താഴെയുള്ള പ്രത്യേക ഇടത്ത് സുരക്ഷിതമായി സൂക്ഷിക്കാനും സൗകര്യമുണ്ട്.

വളർത്തുമൃഗങ്ങളെ സ്നേഹിക്കുന്നവർക്കായി സാങ്കേതികവിദ്യയും സൗകര്യങ്ങളും ഒരുമിപ്പിച്ച പുതിയ ആശയമാണ് പ്യൂഷോ ഇ-5008 ഡോഗ് എഡിഷൻ കോൺസെപ്റ്റ് വാഹനം.