ന്യൂഡൽഹി: ഡൽഹിയിൽ നടന്ന 'ഇന്ത്യ മൊബൈൽ കോൺഗ്രസിൽ' തങ്ങളുടെ അത്യാധുനിക എഐ സ്മാർട്ട് വെയറബിൾ ഉപകരണമായ 'ജിയോ ഗ്ലാസസ്' (Jio Glasses) അവതരിപ്പിച്ച് റിലയൻസ് ജിയോ. ഫോൺ എടുക്കാതെയും ആപ്പുകൾ തുറക്കാതെയും വെറുമൊരു ക്യുആർ (QR) കോഡിലേക്ക് നോക്കി വോയിസ് കമാൻഡ് നൽകി മാത്രം യുപിഐ (UPI) പണമിടപാടുകൾ നടത്താൻ ഈ എഐ ഗ്ലാസ് ഉപയോക്താക്കളെ സഹായിക്കും.
ജിയോ ഗ്ലാസസിലെ ക്യാമറ ക്യുആർ കോഡ് സ്കാൻ ചെയ്യുകയും, ഉപയോക്താവ് നൽകുന്ന ശബ്ദ നിർദ്ദേശത്തിന്റെ (Voice Command) അടിസ്ഥാനത്തിൽ പേയ്മെന്റ് പൂർത്തിയാക്കുകയും ചെയ്യും. 'യുപിഐ സർക്കിൾ' വഴിയാണ് ഇടപാടുകൾ സാധ്യമാകുന്നത്. യുപിഐ സർക്കിൾ ചട്ടങ്ങൾ പ്രകാരം ഓരോ ഇടപാടിലും 5,000 രൂപ വരെയും പ്രതിമാസം 15,000 രൂപ വരെയും പണമടയ്ക്കാൻ സാധിക്കും.
ഡിജിറ്റൽ പേയ്മെന്റുകൾക്ക് പുറമെ, വ്യത്യസ്ത ഇന്ത്യൻ ഭാഷകൾ സംസാരിക്കുന്നവർക്ക് തത്സമയ വിവർത്തനം (Real-time Translation) സാധ്യമാക്കുന്ന എഐ സാങ്കേതികവിദ്യയും ഇതിലുണ്ട്. ഒരാൾ സംസാരിക്കുന്നത് മറുവശത്തുള്ളയാളുടെ ഭാഷയിലേക്ക് അപ്പോൾത്തന്നെ തർജ്ജമ ചെയ്യാൻ ഈ ഗ്ലാസിന് സാധിക്കും. മീറ്റിംഗുകളിലും ചർച്ചകളിലും വിവരങ്ങൾ രേഖപ്പെടുത്താനുള്ള എഐ നോട്ട്-ടേക്കിങ് (AI Note-taking) സംവിധാനവും ക്രിക്കറ്റ് മത്സരങ്ങളുടെ തത്സമയ കമന്ററി കേൾക്കാനുള്ള സൗകര്യവും ജിയോ ഗ്ലാസസിൽ ഉൾപ്പെടുത്തിയിട്ടുണ്ട്.
