പരിക്ക് ഗുരുതരം; ജമീമ റോഡ്രിഗസിന് ഏഷ്യാ കപ്പും ഏഷ്യൻ ഗെയിംസും നഷ്ടമാകും
ലണ്ടൻ: ദി ഹൺഡ്രഡ് ടൂർണമെന്റിനിടെ പരിക്കേറ്റ ഇന്ത്യൻ വനിതാ ക്രിക്കറ്റ് താരം ജമീമ റോഡ്രിഗസിന് വരാനിരിക്കുന്ന ഏഷ്യാ കപ്പും ഏഷ്യൻ ഗെയിംസും നഷ്ടമാകും. വലത് കാൽത്തുടയിലെ പേശികൾക്ക് പരിക്കേറ്റതിനെ തുടർന്നാണ് താരത്തിന് വിശ്രമം അനുവദിച്ചിരിക്കുന്നത്.
ആഗസ്റ്റ് മൂന്നിനാണ് ജമീമയ്ക്ക് പരിക്കേറ്റത്. തുടർന്ന് ബെംഗളൂരുവിലെ ബി.സി.സി.ഐ. സെന്റർ ഓഫ് എക്സലൻസിലെ മെഡിക്കൽ സംഘം നടത്തിയ വിശദമായ പരിശോധനയിൽ പരിക്കിന്റെ ഗൗരവം സ്ഥിരീകരിക്കുകയായിരുന്നു. പൂർണമായി സുഖം പ്രാപിക്കുന്നതുവരെ മത്സരങ്ങളിൽനിന്ന് വിട്ടുനിൽക്കാനാണ് താരത്തിന് നിർദേശം.
ഇംഗ്ലണ്ടിൽ നടക്കുന്ന ദി ഹൺഡ്രഡ് ടൂർണമെന്റിൽ സതേൺ ബ്രേവിനായി കളിക്കുന്നതിനിടെയാണ് ജമീമയ്ക്ക് പരിക്കേറ്റത്. ടൂർണമെന്റിൽ മികച്ച ഫോമിലായിരുന്ന താരം ആറ് ഇന്നിങ്സുകളിൽനിന്നായി 143 റൺസ് നേടിയിരുന്നു. രണ്ട് തവണ പ്ലെയർ ഓഫ് ദി മാച്ച് പുരസ്കാരവും സ്വന്തമാക്കി.
ജമീമയുടെ അഭാവത്തിൽ ഏഷ്യാ കപ്പിനുള്ള ഇന്ത്യൻ ടീമിൽ പ്രതിക റാവലിനെ ഉൾപ്പെടുത്തി. ദുബായിൽ ആഗസ്റ്റ് 28 മുതൽ സെപ്റ്റംബർ 13 വരെയാണ് വനിതാ ഏഷ്യാ കപ്പ് നടക്കുന്നത്.
ജപ്പാനിലെ ഐചി-നഗോയയിൽ സെപ്റ്റംബർ 19 മുതൽ ഒക്ടോബർ നാല് വരെയാണ് ഏഷ്യൻ ഗെയിംസ് മത്സരങ്ങൾ.
ഹർമൻപ്രീത് കൗർ (ക്യാപ്റ്റൻ), സ്മൃതി മന്ദാന (വൈസ് ക്യാപ്റ്റൻ), ഷഫാലി വർമ്മ, ഭാരതി ഫുൽമാലി, ദീപ്തി ശർമ, റിച്ച ഘോഷ (വിക്കറ്റ് കീപ്പർ), ജി. കമാലിനി (വിക്കറ്റ് കീപ്പർ), അരുന്ധതി റെഡ്ഡി, പ്രേമ റാവത്ത്, രാധ യാദവ്, ശ്രീ ചരൺ, രേണുക സിങ്, നന്ദിനി ശർമ, ക്രാന്തി ഗൗഡ്, പ്രതിക റാവൽ.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.