തിരുവനന്തപുരം: ഒക്ടോബർ 29 ഇന്ന് രാജ്യാന്തര ഇന്റർനെറ്റ് ദിനമായി ആചരിക്കുന്നു. മാനവചരിത്രത്തെയും വിവരസാങ്കേതികവിദ്യയെയും അടിമുടി മാറ്റിമറിച്ച ആദ്യ ഇന്റർനെറ്റ് സന്ദേശത്തിന്റെ സ്മരണ പുതുക്കിയാണ് ലോകമെമ്പാടും ഈ ദിനം ആഘോഷിക്കുന്നത്. ആശയവിനിമയം, വിദ്യാഭ്യാസം, വ്യവസായം, വിനോദം തുടങ്ങി മനുഷ്യജീവിതത്തിന്റെ എല്ലാ മേഖലകളെയും ഇന്റർനെറ്റ് ഇന്ന് സ്വാധീനിച്ചിരിക്കുന്നു.
1969 ഒക്ടോബർ 29-നാണ് ചരിത്രത്തിലാദ്യമായി ഒരു കമ്പ്യൂട്ടറിൽ നിന്ന് മറ്റൊരു കമ്പ്യൂട്ടറിലേക്ക് ഇന്റർനെറ്റ് നെറ്റ്‌വർക്ക് വഴി സന്ദേശം അയച്ചത്. കാലിഫോർണിയ സർവകലാശാലയിലെ പ്രൊഫസർ ചാൾസ് ക്ലൈൻ അയച്ച 'LOGIN' എന്ന വാക്കിന്റെ ആദ്യ രണ്ട് അക്ഷരങ്ങളായ 'LO' മാത്രമാണ് അന്ന് വിജയകരമായി കൈമാറാൻ കഴിഞ്ഞത്. ഈ ചരിത്രപരമായ നിമിഷത്തിന്റെ ഓർമ്മയ്ക്കായി 2005 മുതലാണ് ഒക്ടോബർ 29 അന്താരാഷ്ട്ര ഇന്റർനെറ്റ് ദിനമായി ആഘോഷിക്കാൻ തുടങ്ങിയത്.
ആദ്യകാലത്തെ മന്ദഗതിയിലുള്ള ഡയൽ-അപ്പ് കണക്ഷനുകളിൽ നിന്ന് തുടങ്ങി, ഇന്ന് 5G സാങ്കേതികവിദ്യയിലും ആർട്ടിഫിഷ്യൽ ഇന്റലിജൻസിലും എത്തിനിൽക്കുന്ന വലിയൊരു വിപ്ലവത്തിനാണ് ലോകം സാക്ഷ്യം വഹിച്ചത്. ലോകത്തെവിടെയുമുള്ള വിവരങ്ങൾ വിരൽത്തുമ്പിൽ ലഭ്യമാക്കാനും മനുഷ്യരെ തമ്മിൽ തടസ്സമില്ലാതെ ബന്ധിപ്പിക്കാനും ഇന്റർനെറ്റ് വഴിയൊരുക്കി. വ്യാജവാർത്തകളും സൈബർ സുരക്ഷാ ഭീഷണികളും വർദ്ധിച്ചുവരുന്ന ഇന്നത്തെ കാലഘട്ടത്തിൽ, ഇന്റർനെറ്റിന്റെ സുരക്ഷിതവും ഉത്തരവാദിത്തമുള്ളതുമായ ഉപയോഗം ഉറപ്പാക്കുക എന്ന സന്ദേശം കൂടിയാണ് ഈ ദിനം ഓർമ്മിപ്പിക്കുന്നത്.
ഇന്ത്യയിലെ കണക്കുകളും വിലക്കുകളും;
ഇന്ത്യയിൽ ആകെ ഇന്റർനെറ്റ് കണക്ഷനുകളുടെ എണ്ണം ഏകദേശം 109.28 കോടിയായി ഉയർന്നു. ഇതിൽ 104.63 കോടിയും വയർലെസ് കണക്ഷനുകളാണ്. ഇതിൽ വലിയൊരു പങ്കും മൊബൈൽ ഫോണുകൾ വഴിയാണ് ഉപയോഗിക്കുന്നത്. എന്നാൽ, ഇന്റർനെറ്റ് ലഭ്യതയ്ക്കൊപ്പം തന്നെ സേവനങ്ങൾ വിലക്കുന്ന പ്രവണതയും രാജ്യത്ത് വർധിച്ചുവരികയാണ്. പുറത്തുവന്ന റിപ്പോർട്ടുകൾ പ്രകാരം, 2025-ൽ ലോകത്ത് ഏറ്റവും കൂടുതൽ തവണ ഇന്റർനെറ്റ് സേവനങ്ങൾ വിലക്കിയ രാജ്യങ്ങളിൽ ഇന്ത്യ രണ്ടാം സ്ഥാനത്താണ്. മ്യാൻമറാണ് പട്ടികയിൽ ഒന്നാമത്.
