ഏകദിന ക്രിക്കറ്റ് പരമ്പര സ്വന്തമാക്കിയ ആവേശത്തിൽ വെസ്റ്റ് ഇൻഡീസിനെതിരായ ടി-20 പരമ്പരയും പിടിച്ചെടുക്കാൻ ഇന്ത്യ ഇന്നിറങ്ങുന്നു. ബുധനാഴ്ച ഹൈദരാബാദിൽ നടക്കുന്ന നാലാം മത്സരത്തിൽ വിജയിച്ചാൽ അഞ്ചുമത്സരങ്ങളുള്ള പരമ്പര ഇന്ത്യക്ക് സ്വന്തമാക്കാം. നിലവിൽ ആദ്യത്തെയും മൂന്നാമത്തെയും മത്സരങ്ങൾ ജയിച്ച ഇന്ത്യ 2-1 എന്ന നിലയിൽ മുന്നിലാണ്. അതേസമയം, പരമ്പര കൈവിട്ടുപോകാതിരിക്കാൻ വിൻഡീസിനെ സംബന്ധിച്ച് ഇന്നത്തെ മത്സരം ജീവന്മരണ പോരാട്ടമാണ്. വൈകീട്ട് ഏഴുമണി മുതലാണ് മത്സരം ആരംഭിക്കുന്നത്.
ഇന്ത്യൻ ബാറ്റിംഗ് നിരയുടെ മിന്നും ഫോമിലാണ് ആരാധകരുടെ പ്രതീക്ഷ മുഴുവൻ. സഞ്ജു സാംസൺ, അഭിഷേക് ശർമ, ഇഷാൻ കിഷൻ എന്നീ യുവതാരങ്ങളുടെ വെടിക്കെട്ട് ബാറ്റിംഗാണ് സമീപകാല വിജയങ്ങൾക്ക് പിന്നിൽ. ഇവർ മികച്ച തുടക്കം നൽകിയാൽ മധ്യനിരയ്ക്ക് സമ്മർദ്ദമില്ലാതെ ബാറ്റ് വീശാം. ഇന്ദോറിലെ കഴിഞ്ഞ മത്സരത്തിൽ അഭിഷേക് ശർമ വെറും 30 പന്തിൽ 6 സിക്സറുകളും 6 ഫോറുകളും സഹിതം 69 റൺസ് അടിച്ചുകൂട്ടിയിരുന്നു. ശ്രേയസ് അയ്യരുടെ കന്നി സെഞ്ചുറിയുടെ ബലത്തിലാണ് ആദ്യ കളി ഇന്ത്യ വിജയിച്ചത്. മുൻനിരയ്ക്ക് തകർച്ച നേരിട്ടാൽ തിലക് വർമ്മ, നിധീഷ് കുമാർ റെഡ്ഡി, നമൻ ധിർ എന്നിവരടങ്ങുന്ന ശക്തമായ മധ്യനിരയും ഇന്ത്യയ്ക്കുണ്ട്.
ഇന്ത്യൻ ബാറ്റിംഗിനെതിരെ പതറുന്ന വിൻഡീസ് ബൗളർമാരാണ് പരമ്പരയിൽ ഇതുവരെ കണ്ടത്. എങ്കിലും ഓപ്പണർ ഷെർഫെയ്ൻ റുഥർഫോർഡിന്റെയും ക്യാപ്റ്റൻ ഷായ് ഹോപ്പിന്റെയും ഫോം സന്ദർശകർക്ക് വലിയ ആശ്വാസമാണ്. 57 ശരാശരിയിൽ 172 റൺസ് നേടിയ റുഥർഫോർഡിന്റെ ബാറ്റിൽ നിന്ന് മൂന്ന് കളികളിലായി 12 സിക്സറുകൾ പിറന്നു കഴിഞ്ഞു. 159 റൺസെടുത്ത ക്യാപ്റ്റൻ ഷായ് ഹോപ്പും ടീമിനെ മുന്നിൽ നിന്ന് നയിക്കുന്നു. റാഞ്ചിയിലെ മത്സരത്തിൽ ഇന്ത്യയുടെ കൂറ്റൻ ലക്ഷ്യം മറികടന്ന് വിജയം പിടിച്ചെടുത്തത് ഇരുവരുടെയും തകർപ്പൻ പ്രകടനത്തിന്റെ ബലത്തിലാണ്.
റണ്ണൊഴുകുന്ന ഹൈദരാബാദ് പിച്ചിൽ വിൻഡീസ് ബാറ്റിംഗ് നിരയെ പിടിച്ചുകെട്ടാൻ ഇന്ത്യൻ ബൗളർമാർ മികച്ച അച്ചടക്കം പാലിക്കേണ്ടതുണ്ട്. അവസാനമായി ബംഗ്ലാദേശിതിരെ ഹൈദരാബാദിൽ കളിച്ചപ്പോൾ ഇന്ത്യ 297 റൺസിന്റെ റെക്കോർഡ് സ്കോർ പടുത്തുയർത്തിയിരുന്നു. ആ മത്സരത്തിൽ സഞ്ജു സാംസൺ 47 പന്തിൽ 111 റൺസ് നേടി തിളങ്ങിയിരുന്നതിനാൽ, ഇന്നും ഹൈദരാബാദിൽ കൂറ്റൻ സ്കോർ പിറക്കുമെന്നാണ് ക്രിക്കറ്റ് പ്രേമികളുടെ പ്രതീക്ഷ.
വിൻഡീസിനെതിരെ പരമ്പര ലക്ഷ്യമിട്ട് ഇന്ത്യ; നാലാം ടി-20 ഇന്ന് ഹൈദരാബാദിൽ
Jaihind TV News Report
Jaihind TV Web Desk
3 min read
165 reads
