ഹാമില്‍ട്ടണ്‍: ന്യൂസിലന്‍ഡിനെതിരായ അഞ്ച് മത്സരങ്ങളുടെ ഏകദിന പരമ്പരയിലെ മൂന്നാം മത്സരം മഴമൂലം ടോസിന് ശേഷം ഉപേക്ഷിച്ചു. ടോസ് നേടി ഇന്ത്യ ഫീല്‍ഡിംഗ് തിരഞ്ഞെടുത്തതിന് പിന്നാലെ ശക്തമായ മഴ വീണ്ടും എത്തിയതോടെയാണ് ഒരു പന്ത് പോലും എറിയാനാകാതെ മത്സരം ഉപേക്ഷിക്കാന്‍ അംപയര്‍മാര്‍ തീരുമാനിച്ചത്. മഴ കാരണം ഒന്നര മണിക്കൂര്‍ വൈകിയതിനെ തുടര്‍ന്ന് മത്സരം 40 ഓവര്‍ വീതമാക്കി വെട്ടിക്കുറച്ചിരുന്നു. പരമ്പരയിലെ ആദ്യ രണ്ട് മത്സരങ്ങളും ജയിച്ച ഇന്ത്യ നിലവില്‍ 2-0ന് മുന്നിലാണ്.
അടുത്ത പോരാട്ടം വെള്ളിയാഴ്ച:
പരമ്പരയിലെ നാലാം മത്സരം വെള്ളിയാഴ്ച മൗണ്ട് മാുംഗനുയിലെ ബേ ഓവലില്‍ നടക്കും. ഈ മത്സരം ജയിക്കാനായാല്‍ ടി20 പരമ്പരയ്ക്ക് പിന്നാലെ ഏകദിന പരമ്പരയും ഇന്ത്യക്ക് സ്വന്തമാക്കാം. അതേസമയം, ടി20 പരമ്പര നഷ്ടമായ ന്യൂസിലന്‍ഡിന് ഏകദിന പരമ്പരയില്‍ ജീവന്‍ നിലനിര്‍ത്താന്‍ നാലാം മത്സരത്തില്‍ വിജയം അനിവാര്യമാണ്. പരമ്പരയിലെ അഞ്ചാമത്തെയും അവസാനത്തെയും ഏകദിനവും ഈ മാസം 15-ന് ഇതേ വേദിയില്‍ തന്നെയാണ് നടക്കുക.
അവസാന മത്സരങ്ങളില്‍ ശ്രേയസ് അയ്യര്‍ നയിക്കും:
വേള്‍ഡ് ടെസ്റ്റ് ചാമ്പ്യന്‍ഷിപ്പ് ഫൈനല്‍ പ്രതീക്ഷകള്‍ നിലനിര്‍ത്താന്‍ ഇന്ത്യക്ക് വരാനിരിക്കുന്ന രണ്ട് ടെസ്റ്റ് മത്സരങ്ങളുടെ പരമ്പര നിര്‍ണായകമാണ്. ഇതിന്റെ മുന്നൊരുക്കങ്ങള്‍ക്കായി നായകന്‍ ശുഭ്മാന്‍ ഗില്‍, കെ.എല്‍. രാഹുല്‍, അന്‍ഷുല്‍ കംബോജ്, കുല്‍ദീപ് യാദവ്, മുഹമ്മദ് സിറാജ് എന്നീ പ്രമുഖ താരങ്ങള്‍ അവസാന രണ്ട് ഏകദിനങ്ങളില്‍ നിന്ന് വിട്ടുനില്‍ക്കുകയാണ്. ഗില്ലിന്റെ അഭാവത്തില്‍ വൈസ് ക്യാപ്റ്റന്‍ ശ്രേയസ് അയ്യരാണ് ഇന്ത്യയെ നയിക്കുന്നത്.
വില്ലനായി മഴ, ടോസിന് ശേഷം ഒറ്റ പന്തുപോലും എറിയാനായില്ല; ഇന്ത്യ-ന്യൂസിലന്‍ഡ് മൂന്നാം ഏകദിനം ഉപേക്ഷിച്ചു
Jaihind TV News Report
Jaihind TV Web Desk
2 min read
131 reads
