അഭിഷേകിന് വെടിക്കെട്ട് സെഞ്ചുറി; വെറും 13.2 ഓവറിൽ കിവീസ് ഉയർത്തിയ 199 റൺസ് ലക്ഷ്യം മറികടന്ന് ഇന്ത്യ

വെല്ലിങ്ടണിൽ നടന്ന മൂന്നാം ടി20 മത്സരത്തിൽ ന്യൂസീലൻഡിനെതിരെ ഇന്ത്യയ്ക്ക് അനായാസ ജയം. കിവീസ് ഉയർത്തിയ 199 റൺസ് വിജയലക്ഷ്യം വെറും 13.2 ഓവറിൽ നാലു വിക്കറ്റ് നഷ്ടത്തിലാണ് ഇന്ത്യ മറികടന്നത്. ഈ വിജയത്തോടെ അഞ്ചു മത്സരങ്ങളടങ്ങിയ പരമ്പര രണ്ടു മത്സരം ശേഷിക്കേ 3-0ത്തിന് ഇന്ത്യ സ്വന്തമാക്കി.

ആദ്യ പന്തുമുതൽ ആഞ്ഞടിച്ച അഭിഷേക് ശർമയാണ് ഇന്ത്യയുടെ ജയം അനായാസമാക്കിയത്. വെറും 15 പന്തിൽ നിന്ന് അർധ സെഞ്ചുറിയും 35 പന്തിൽ നിന്ന് സെഞ്ചുറിയും തികച്ച അഭിഷേക്, 38 പന്തിൽ നിന്ന് 11 സിക്‌സും ഒമ്പത് ഫോറുമടക്കം 113 റൺസെടുത്ത് പുറത്തായി. അദ്ദേഹത്തിന് മികച്ച പിന്തുണ നൽകി തകർത്തടിച്ച കൗമാര താരം വൈഭവ് സൂര്യവംശി വെറും 19 പന്തിൽ നിന്ന് നാലു വീതം സിക്‌സും ഫോറുമടക്കം 45 റൺസെടുത്തു. ഇരുവരും ചേർന്ന് ഓപ്പണിങ് വിക്കറ്റിൽ വെറും 43 പന്തിൽ നിന്ന് 133 റൺസാണ് അടിച്ചെടുത്തത്.

വെറും 2.2 ഓവറിൽ ഇന്ത്യൻ സ്‌കോർ 50 കടന്നു. അന്താരാഷ്ട്ര ടി20-യിൽ ഏറ്റവും വേഗത്തിൽ 50 റൺസിലെത്തുന്ന ടീമെന്ന റെക്കോഡ് റൊമാനിയ, പാപ്പുവ ന്യൂ ഗിനിയ എന്നിവർക്കൊപ്പം ഇന്ത്യ സ്വന്തമാക്കി. അഞ്ച് ഓവറിൽ ഇന്ത്യൻ സ്‌കോർ 100-ൽ എത്തിയതോടെ ഏറ്റവും വേഗത്തിൽ 100 റൺസ് അടിച്ചെടുക്കുന്ന ടീം എന്ന റെക്കോഡും ഇന്ത്യയുടെ പേരിലായി. പവർപ്ലേയിൽ 118 റൺസെടുത്ത ഇന്ത്യ, അന്താരാഷ്ട്ര ടി20-യിലെ ഏറ്റവും ഉയർന്ന പവർപ്ലേ സ്‌കോർ എന്ന റെക്കോഡും സ്വന്തമാക്കി. വൈഭവ് പുറത്തായതിനു പിന്നാലെയെത്തിയ സഞ്ജു സാംസണെ (18) കൂട്ടുപിടിച്ച് അഭിഷേക് ടീമിനെ വിജയത്തിലേക്ക് നയിച്ചു. ശ്രേയസ് അയ്യർ അഞ്ച് റൺസെടുത്ത് പുറത്തായി.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ന്യൂസീലൻഡ് 20 ഓവറിൽ മൂന്നു വിക്കറ്റ് നഷ്ടത്തിൽ 198 റൺസെടുത്തിരുന്നു. 52 പന്തിൽ അഞ്ചു വീതം സിക്‌സുകളും ഫോറുകളുമുൾപ്പടെ 89 റൺസെടുത്ത ഡാരിൽ മിച്ചലിന്റെ ഇന്നിങ്‌സാണ് കിവീസിനെ മികച്ച സ്‌കോറിലെത്തിച്ചത്. ഫിൻ അലൻ 40 റൺസും, 23 പന്തിൽ 39 റൺസെടുത്ത ബെവൺ ജേക്കബ്‌സ് പുറത്താകാതെയും മികച്ച പിന്തുണ നൽകി. ഫിൻ അലനും മിച്ചലും ചേർന്ന് 86 റൺസിന്റെ കൂട്ടുകെട്ടും, മിച്ചൽ - ജേക്കബ്‌സ് സഖ്യം 75 റൺസിന്റെ കൂട്ടുകെട്ടും പടുത്തുയർത്തിയെങ്കിലും അഭിഷേക് ശർമയുടെ ബാറ്റിങ് കരുത്തിന് മുന്നിൽ കിവീസ് കീഴടങ്ങുകയായിരുന്നു.