ഗുരുവായൂർ: തുലാമാസാരംഭ ദിനത്തിൽ ഗുരുവായൂർ ക്ഷേത്രത്തിൽ വഴിപാടായി കൺവേയർ ഡിഷ് വാഷ് മെഷീൻ സമർപ്പിച്ചു. ക്ഷേത്രത്തിലെ അന്നലക്ഷ്മി ഹാളിൽ ഉപയോഗിക്കുന്ന പാത്രങ്ങളും ഗ്ലാസുകളും അതിവേഗം കഴുകി വൃത്തിയാക്കാൻ സഹായിക്കുന്ന അത്യാധുനിക യന്ത്രസംവിധാനമാണിത്. ഇന്ന് രാവിലെ ആറേകാലോടെ അന്നലക്ഷ്മി ഹാളിൽ നടന്ന ചടങ്ങിൽ ആഭ്യന്തര മന്ത്രി രമേശ് ചെന്നിത്തല സമർപ്പണം നിർവ്വഹിച്ചു.
തിരുവനന്തപുരം സ്വദേശിയും ഗുരുവായൂരപ്പ ഭക്തനുമായ ഗണേഷ് കുമാറാണ് ഡിഷ് വാഷ് മെഷീൻ വഴിപാടായി നൽകിയത്. ഇതിനുപുറമെ, 4000 സ്റ്റെയിൻലെസ് സ്റ്റീൽ പാത്രങ്ങളും അദ്ദേഹം ക്ഷേത്രത്തിലേക്ക് സമർപ്പിച്ചു. ചടങ്ങിനെത്തിയ മന്ത്രി രമേശ് ചെന്നിത്തലയെ ദേവസ്വം അഡ്മിനിസ്ട്രേറ്റർ എസ്. ഹരി ഗോപാൽ പൊന്നാടയണിയിച്ച് സ്വീകരിച്ചു.
സമർപ്പണ ചടങ്ങിൽ ദേവസ്വം ഭരണസമിതി അംഗങ്ങളായ കെ.എസ്. ബാലഗോപാൽ, എം.യു. ഷിനിജ, ദേവസ്വം അഡ്മിനിസ്ട്രേറ്റർ എസ്. ഹരി ഗോപാൽ, ക്ഷേത്രം ഡി.എ എം. രാധ, മരാമത്ത് എക്സിക്യൂട്ടീവ് എൻജിനീയർ എം.കെ. അശോക് കുമാർ, ഇലക്ട്രിക്കൽ എൻജിനീയർ വിനോദ് കുമാർ, ദേവസ്വം ജീവനക്കാർ, ഭക്തജനങ്ങൾ തുടങ്ങിയവർ പങ്കെടുത്തു.
