സംസ്ഥാനത്ത് സ്വർണവില കുതിച്ചുയരുന്നു. ഇന്ന് ഒരു പവൻ 22 കാരറ്റ് സ്വർണത്തിന് 360 രൂപ കൂടി 1,12,080 രൂപയായി. ഗ്രാമിന് 45 രൂപയാണ് വർദ്ധിച്ചത്. ഇതോടെ ഒരു ഗ്രാം സ്വർണത്തിന്റെ ഇന്നത്തെ വില 14,010 രൂപയിലെത്തി.
കഴിഞ്ഞ കുറച്ചുദിവസങ്ങളായി സ്വർണവിലയിൽ വലിയ മാറ്റങ്ങളാണ് പ്രകടമാകുന്നത്. ഈ മാസം രണ്ടാമത്തെ തീയതി രേഖപ്പെടുത്തിയ 1,09,240 രൂപയാണ് ഏപ്രിലിലെ ഏറ്റവും കുറഞ്ഞ നിരക്ക്. അവിടെ നിന്നാണ് ഇന്ന് വില 1,12,000 കടന്നിരിക്കുന്നത്.അതേസമയം, കുതിച്ചുയരുന്ന ക്രൂഡോയിൽ വിലയും സാമ്പത്തിക പ്രതിസന്ധിയും മറികടക്കാൻ ലോകരാജ്യങ്ങൾ കരുതൽ സ്വർണം വിറ്റഴിക്കുകയാണ്.
പശ്ചിമേഷ്യയിലെ യുദ്ധം എണ്ണ പ്രതിസന്ധി രൂക്ഷമാക്കിയതോടെ ധനകമ്മി കുറയ്ക്കാനും കറൻസി മൂല്യം സംരക്ഷിക്കാനുമാണ് രാജ്യങ്ങൾ സ്വർണത്തെ ആശ്രയിക്കുന്നത്. പ്രതിസന്ധിക്കാലത്തെ ഏറ്റവും സുരക്ഷിതമായ നിക്ഷേപം എന്ന നിലയിൽ സ്വർണത്തിന്റെ ഡിമാൻഡ് വർദ്ധിക്കുന്നതാണ് വിലക്കയറ്റത്തിന് പ്രധാന കാരണമായി വിലയിരുത്തുന്നത്.
